Shillong, Lber 28
Ka sienjam jong ka ‘My Bharat Meghalaya’ ka la seisoh ha ka ban pynlong ïa ka ‘Viksit Bharat Youth Parliament Festival’ ha Meghalaya Legislative Assembly Annexe Hall, Rilbong, ha ka Sngi Saitjaiñ, kaba la lum lang ïa ki samla nongïalam bad ki nongwanrah jingkylla na kylleng ka Jylla.
Ka tamasa kaba la pynshong nongrim halor ka phang “Union Budget 2026: Strengthening the Indian Youth’s Path towards Viksit Bharat 2047”, ka la sakhi ïa ki jingïakren kiba shit rhem, ha kaba ki nongïashim bynta ki la pyni ïa ka jingtbit ban kren bad ban pynpaw ïa ki jingsngew kiba shon jingmut halor ki mat kiba ktah ïa ki jaidbynriew jong ki.
Ki 5 ngut ki nongïakhun kiba la shah jied ki long ka Riwaka Tangsong bad Rabeclyne Kharbyngar (East Khasi Hills), Sengrimchi Marak (East Garo Hills), Pynhiammiki Ryngksai (East Khasi Hills), bad ka Riakor Lyngdoh Nonglait (Eastern West Khasi Hills). Kine ki nongjop kin mihkhmat ïa ka Jylla sha ka ‘National Level Youth Parliament’ ha New Delhi ha u bnai ban wan.
Kane ka jingïalang ka thmu ban pynroi ïa ki rukom ïakren, ka jinglong nongïalam, bad ka jingïadon bynta lang hapdeng ki samla, kaba ai lad ïa ki ban sei rynsan ïa ki jingmut (jong ki) bad ban synñiang ha ka ban tei ïa ka ri.
Haba kren ha ka jingïalang plie, ka Kongsan kaba dei ruh u MLA ka Ampati, ka Miani D. Shira, ka la ban jur halor ka jingdonkam jong kum kine ki rynsan ha ka ban pynheh-pynsan ïa ki samla nongïalam.
Ka la pynshlur ïa ki nongïashim bynta ban long kiba shisha bad ban kren naduh ka dohnud.
“Ha kaba kut jong ka sngi, kaei-kaei kaba mih na shapoh kan kren kham jam ban ïa kano-kano kaba phi la pynkhreh ne kaba la pynlong ban kren,” ka la pynpaw.
Ka la ong shuh-shuh ba kum kine ki jingïakynduh ki ïarap ïa ki samla ban sngewthuh ïa ki jingmut jong ki nongthaw aiñ bad ka nongrim kaba don ha lyndet ban thaw ïa ki polisi.
“Ka dei ka jingïakynduh kaba kongsan ban sngewthuh ïa ki jingmut bapher-bapher bad ka jinglong jong ka kam kaba ngi trei,” ka la bynrap.
U Symbud Kongsan uba dei ruh u MLA ka Mawphlang, u Bah Matthew Beyondstar Kurbah, u la ai mynsiem ïa ki samla ba kin pyndonkam hok ïa ka kabu, da kaba kdew ba kum kine ki rynsan ki tei ïa ka jingshaniah bad ki sap ki phong kiba neh.
“Baroh na phi, phi lah ban ym long ki ‘riewsaiñ pyrthei, hynrei phin sa kren ha kiba bun ki rynsan. Ka jingshemphang kaba phi ïoh hangne kan sah bad phi junom,” u la ong.
Ka Linda B.K. Sangma, Director, ‘My Bharat Meghalaya’, ka la kdew ba ka ‘Viksit Bharat Youth Parliament Festival 2026’, ka sienjam hapoh ka tnad Youth Affairs & Sports, ka Sorkar India, ka pyni ïa ka jingshimkhia lang ban pynkupbor ïa ki samla kum ki nongshim bynta ba trei shit rhem ban tei ïa ka ri.
