Mawkyrwat, Lber 29
Ka ‘erïong kaba jur ha ryngkat bad u phria ha ka step jong ka 28 tarik u Lber, 2026 ka la lynshop ïa ki shnong bapher bapher hapoh ka South West Khasi Hills District ha baroh ar tylli ki Block, kata, ka Mawkyrwat bad Ranikor C&RD Block bad ha kane ka jingjia kumba 68 tylli ki ïing bad 4 tylli ki skul ki la julor bad ktah ruh ïa kumba 323 ngut ki briew, hynrei donbok ba ym shym la don kano kano ka jingjia ba sngewsih.
Ki tyllong khubor na ki bor Sorkar ki la pyntip ba katei ka jingjia ka la jia ha ka por kumba 4:00 – 5:00 mynstep ha kaba ka ‘erïong ryngkat u phria ki la lynshop ïa kumba 26 tylli ki shnong kiba hap hapoh ka Mawkyrwat C&RD Block bad 2 tylli ki shnong kiba hap hapoh ka Ranikor C&RD Block ha kaba ka la pynjulor ruh ïa ki ïing ki sem bad ki skul.
La ïathuh ba kiba bun ki ïing kiba la shah pynjulor da kaba ka ‘erïong ka la lied noh ïa ki tnum ïing bad ki la don ruh ki jingjia ha kaba ka ‘erïong ka la jynrat ïa ki tynrai dieng ne pyndkut ïa ki tnat dieng ba heh kiba la hap bad pynjulor ïa ki ïing.
Ki tyllong khubor ki la pyntip ruh ba ki don saw tylli ki skul, kata ka Mawphanrang LP School, Laitlawsnai RC LP School, ka Umdohlun COG Secondary School bad ka Rymmang Secondary School kiba la mad ïa ka jingjulor kaba jur ha kane ka jingjia.
Ki tyllong khubor ki la ïathuh ruh ba ki shnong kiba la shah ktah jur ki kynthup ïa ka shnong Manad, Mawbidong, Mawjarain, Nongbah Marshillong, Nongnam bad Nongbrei-Nongdom, baroh ki hap hapoh ka Mawkyrwat Block.
