Mawkyrwat, Lber 29
Ka shnong Sakwang kan long kaba nyngkong eh na South West Khasi Hills District ka ban sa ïoh ïa ka madan ïalehkai athletic ne ka Synthetic Athletic Track ha kaba ka Sorkar Jylla la pynkhreh ban tei ha ka jinglut kumba T. 13 klur tam.
Kane ka la wan hadien ka jingplie ïa u mawnongrim da u Myntri ka tnat ïalehkai ka Sorkar Jylla, u Bah Wailadmiki Shylla ha ka 27 tarik mynta u bnai ha kaba la ïadon lang u Bah Renikton Lyngdoh Tongkhar, MLA ka thaiñ ha ryngkat.
Kumba ka paw ka shnong Sakwang ka la long kaba paw lyngba ka jingdon ïa ki nongïalehkai kiba kynsai kiba kynthup ïa u Bah Biningstar Lyngkhoi uba la wanrah nam bad burom ïa ka jylla bad ka ri hi baroh kawei lyngba ka jingtrei shitom jong u ha ki por kiba la leit.
Kum ban shu kdew u Bah Biningstar u la thaw ïa ka record thymmai ha ka National Games kaba la long ha Guwahati ha u snem 2007. U la ïashim bynta ruh ha ka Asian Games ha u snem 2010 bad South Asian Games ha u snem 2006.
Na ka liang u Bah Weiladmiki, u la pynpaw ka jingkmen kaba khraw ba ka shnong Sakwang ka la pynmih ïa u khlur mareh marathon ba paw bad lyngba ka jingtrei shitom jong u. “Ka Sorkar Jylla mynta ka la wanrah ïa kane ka projek kaba heh kum ka dak ka jingburom ïa u.”
U la kyntu ïa ki samla ba kin shim ïa kane kum ka jingai mynsiem bad ka nuksa ba ki dei ban trei shitom ha ki jingïalehkai jong ki khnang ba ha kawei ka sngi kin sa wanrah nam bad burom ïa ka Jylla hi baroh kawei, bad ruh ba kan long ruh ka jingmyntoi na ka bynta jong ki.
Shuh shuh u la ong ruh ba ka sorkar MDA kam ju kular kulmar, hynrei haba ka kular ka pynurlong ruh ïa kata. Te kumta u la bynshet ïa ka jingkitkhlieh ha ki ophisar ka tnat ïalehkai ba ki dei ban pyntikna ba kane ka jingtrei yn dep ha ka por kaba biang.
U la kyntu ruh ïa ka shnong ba kan shim ïa ka jingkitkhlieh ban sngewtrai bad sumar na ka bynta kane ka madan, ka ban sa wanrah shibun ki jingkyrkhu ïa ka shnong ka thaw.
Kiweipat kiba la don lang ha kartei ka sngi ki long u MDC barim ka Mawkyrwat bad Co-Chairman ka State Reform Development Committee, Bah Carness Sohshang, u District Sports Officer ka SWKHD, Bah Damang Syngkon, u President barim ka NPYF, Bah Kitborlang Nongrem, u Myntri ka shnong Sakwang, Bah Shainingstar Kharjahrin lem bad kiwei-kiwei ki riew rangbah.
