Jowai, Lber 28
Ki khynnah skul ka Jowai Public School kila pyndep ïa ka jingshah hikai kaba 10 sngi hapoh jong ka SPARK (School Programmes in Articulation, Resilience and Kindness) kaba dei ka prokram jong ka tnad pule puthi ka Sorkar Jylla bad ka Samagra Shiksha – State Education Mission Authority of Meghalaya (SEMAM).
Ka SPARK ka thmu ban pynkup bor bad tei ïa ka jinglong jingman jong ki khynnah skul lyngba ki jinghikai, ba kin nang ban kren paidbah, ban pynrung ha ki ïa ka jingshaniah, ka jingngeit ha lade, kiba skhem jingmut, ban don ïa ka rukom pyrkhat pyrdain kaba long janai, bad ban pynroi ïa ka jingsngewthuh shaphang ka STEM (Science, Technology, Engineering, and Mathematics).
Ïa kane ka jinghikai, la pynkut da ka jingsam syrnot sha ki khynnah skul bad nonghikai ha ka jingdonlang u Myntri ka tnad pule puthi ka Sorkar Jylla Ma Lahkmen Rym-bui, ka Assistant Commi-ssioner, Jowai Emelya Ch Momin, ka DSEO Dr Wa-i-sa Sumer ha ka jingïalang kaba la long ha Hall ka skul ha ka 28 tarik Lber.
U Ma Lahkmen ha ka jingkren u pynpaw ka jingkmen ban ïohi ïa ka sap jong ki khynnah kaba long shisha ka sap kaba phylla. Kane ka rynsan ka don shisha ïa ka jinghikai hynrei nang pyntbit shuh shuh ïalade katkum ka jingïaid ka juk kaba mynta bad ha kajuh ka por kiar na kiei kiei kiba pynthut ïa ka jingroi jong ka jingmut jingpyrkhat jong phi (Khynnah).
Ym don ba lah ban khanglad ïa phi, tang kawei hi kaba lah ban khanglad ïa phi kata ka long ba phim ithuh ïalade, lada phi ithuh ïalade phi lah ban leh ïa ki jingphylla ha ka jingim jong phi, u la ong.
U la pyntip ba ka Sorkar Meghalaya hapoh ka jingïalam jong u Conrad K Sangma, kala pynlut 16 klur na ka bynta kane ka prokram ha baroh kawei ka jylla ban pynkup bor ïa ki khynnah pule da ki sap kiba kyrpang ba kin pynkhreh ïa la ka jingim lada ki mad ïa kino kino ki jingtynjuh.
U la kren ruh halor ka jingnang kiew jong juk jingstad technology da kaba ai nuksa ïa ka thma kaba ïaleh mynta ha Iran kaba don ha Middle East la pyndonkam da ka jingstad technology.
U la kren ruh halor ka AI kaba don la ka jong ka jingthmu bad la ka jong ka jingmyntoi, hynrei kumba ka long mynta u la ong ba ka jingwan jong ka AI ka long kaba shyrkhei bha.
U Myntri u pynpaw ka jingsngewsih ïa ka jinglap jong u halor ka jingpyndonkam jong ki katto katne ki nonghikai da ka ChatGPT ban set ïa ki jingkylli, bad kyntu ruh ïa ki ban pyndonkam ïa ka jabieng bad ha kajuh ka por u la kyntu ïa ki khynnah pule ban kiar na kaba pyndonkam technology haba jubab ïa ki jingkylli.
“Nga kwah, ba phi dei ban pyndonkam ïa ka sap jong phi ban shna ïa ki AI bapher bapher, ym ban pyndonkam ïa ka AI kaba la pynmih da kiwei pat”, la ong u Myntri.
Ka Emelya Ch. Momin ha ka jingkren kala ong, hakhmat ki paralok, ki nonghikai ki khynnah ki lah ban bakla hynrei ym shah bishar ïa kata. Kala pynshlur ruh ïa ki ba kin ïai pyrshang, ban long kiba shlur, bad kiba sbun.
Ha kane ka sngi kala don ruh ka jingkren halor ka jingshem ne testimonials na ki khynnah pule bad ki nonghikai kiba la ïathuh ïa ki jingshem jong ki bad ka jingktah jong ka SPARK ha ka jingroi jingpar jong ki shimet bad ha ka jingpule.
