Shillong, Lber 29
Ka Directorate of Food, Civil Supplies and Consumer Affairs Meghalaya, ka la pynshai sha ki paidbah nongshong shnong ba kam don kano kano ka jingduna tyndong lyer LPG ha ka jylla.
Kane ka dei hadien ba la mih ha kawei ka lad pathai khubor kaba ong ba ha Meghalaya la duh tyndong lyer shet bad la shah ktah jur ki nongpyndonkam.
Ka tnad ka la pyntip ba ka jingsam LPG ka long kumba ju long man ka por bad ka Sorkar Jylla ruh ka ïai peit bniah bad buddien ïa kane ban pynthikna ba ki nongpyndonkam ba shisha kin ïoh khlem da don jingthut.
Ka Sorkar Jylla ka la pynkhlain ka jingpeit bniah ha ka jylla lyngba ki District LPG Committee ryngkat ka jingpyntip bad ka jingïatreilang bad ki company umphniang.
Ka tnad ka la pyntip ba ka jingslem ban sam ïa ki tyndong lyer shet ka dei namar ba ka jingpynbeit ïa ka polisi, ka jingleh ïa ki KYC, ka jingartatien ha ka jingtreikam u nongsam bad ka jingsaphriang ki khubor thok kaba pynlong ïa ki nongpyndonkam tyndong lyer shet ban kulmar.
Kane ka ktah ïa ka jingbook bad ka rukom supply tyndong lyer shet kaba pynslem, hynrei ka jinglong jingman mynta ka la kham biang bad ka jingsam ïa ki tyndong lyer shet ka la sdang biang naduh ka 24 tarik u Lber bad kan ïai bteng ban pynbiang ïa ki ïing ki sem.
Ka tnad ka pyntip ruh ba hapdeng ka 25 tarik haduh 27 tarik la sam haduh 22,094 tylli ki tyndong lyer shet ha baroh kawei ka jylla kaba ka jingsam man ka sngi ka long 7,300-7400 tylli kaba lah ban ïa nujor hashwa ka jingeh.
Ka jingpynpoi ka la nang kiew bha, da kaba pynkiew ïa ka jingleit jingwan haduh 30 tylli ki trok ha ka shisngi. Ka jingpynbiang ïa ki commercial LPG ruh ka nang kiew suki suki, da ka jingkheiñ kyllum kaba 190-200 cylinder ha ka shisngi, da kaba buh hakhmat eh na ka bynta ki bynta kiba donkam bad kiba ktah jur. Kane ka jinglong jingman ka pyni shai ba ka jingpynbiang tyndong lyer shet ka biang.
Ka Sorkar Jylla ka la phah pynlong ruh ïa ka jingjurip man ka sngi da ki District bad ki Sub-Divisional Supply Branch Office bad la aiti man ka sngi ïa ki kaiphod sha ka tnad Petroleum and Natural Gas na ka bynta ban peit bniah bad ban shimkhia ha ka por kaba biang. Yn pynshitom ruh pyrshah ïa kino kino kiba die palat, ka jingdie lypa, lane ka jingphah siew dor palat.
Ka tnad ka la kyntu ruh ïa ki paidbah ba kin ym kulmar hynrei ban shaniah ïa ki jingpyntip ba thikna bad kino kino kiba donkam jingpynshai ki lah ban pyntip ha kine ki number ka Directorate’s Toll-free No. 1967 lane WhatsApp No. 9402327737.
