Shillong, Lber 29
U nongïalam ka BJP, Bah A.L. Hek ha ka Sngi Thohdieng u la ong ba ka jingphet seng jong kito kiba angnud ban ïoh tiket ha Assam kan ym khanglad ïa ka seng jong u ban wanphai biang ha ka bor synshar hadien ka ilekshon sha ka Ïingdorbar Thawaiñ.
“Man la ka ilekshon phin ïohi shibun ki ‘Aaya Ram’, ki ‘Gaya Ram’ – kata kan ïai bteng ban jia,” ong u Bah Hek sha ki nongthoh khubor.
“Ngim lah ban pynhun ïa baroh ki nongïalam, lane ki nongïalam kiba pynhun ïa ka seng saiñ pyrthei. Kam jia tang bad ka BJP. Ki don bun bah ruh na ka Congress bad kiwei-kiwei ki seng kiba pynïasoh sha ka BJP,” u la ong.
Haba kylli la ka BJP kan mad jingeh ne em hadien ba don ki bym ïoh tiket ki la leit ban pynïasoh noh sha ka Congress ne ban ïakhun kum ki kyrtong shimet, u Bah Hek u la ong ba kane ka don ïa ka jingmanbha bad ka jingktah kumjuh ïa baroh arliang.
“Ha ka por ilekshon, phin sa ïohi shibun ki ‘Aaya Ram’, ki ‘Gaya Ram’ kiba ju jia ha ka saiñ pyrthei”, u la ong.
“Ïa kata ym lah ban kiar,” u la ong.
U la ban jur ba kane ka dei ka jinglong jong baroh ki seng saiñ pyrthei, ym tang ka BJP, NPP, Congress ne UDP.
Halor ki jingkheiñ ba ka seng kan ïoh ha kane ka kynti, u Bah Hek u la kyntait ban ai ïa ki nombar.
“Ngam lah ban ong katno tylli ki ‘seat’ ka BJP kan jop, hynrei ka Sorkar BJP kan bteng beit ha Assam,” la ong u Myntri Rangbah.
Shuh shuh u la kdew ba ki ‘Karyakarta’ bad ki nongïalam jong ka seng “ki trei shitom bha ban ïoh ïa ka jingbun paid kaba pura,” hynrei u la bynrap “wat lada kim poi sha ka jingbun paid, hynrei ka BJP kan dang synshar ha ka Jylla.”
