Jowai, Lber 30
Ka Lion Y&SA ka la jam sha ka semi final ha ka District Cricket League 2026 ba la pynïaid da ka West Jaiñtia Hills District Cricket Association, hadien ba ka la lah ban pynliem noh ïa ka PCC Phramer da 54 run ha ka lah sngi U Blei ha Khliehtyrchi Mini Stadium.
Ha kane ka jingïakhun quarter final balai jong kane ka lympung, ka PCC Phramer kaba la jop ïa ka kynting pisa ka la ailad ïa ka Lion Y&SA ba kan tied nyngkong ha kaba ka la kamai 168 run ha ki 32.5 over bad shah pynkhyllem baroh ki nongtied. U Kitboklang Rngad ula long u nongtied uba la ïoh bun tam da kaba u la tied 28 run na ki 50 bol bad u Noondaystar Pohrmen u la ïoh 23 run na ki 24 bol. Na ka liang ki nongkawang bol ka PCC Phramer, u Deimiki Rabon ula khur 4 wiket ha ki 6.5 over bad u Ram Ksoo u la ïoh 3 wiket ha ki 7 over.
Haba wan beh ïa ka thong, ka PCC Phramer kam shym la lah ban kynjoh sha ka thong hadien ba ka la kamai tang 114 run ha ki 25.1 over bad shah pynkhyllem baroh ki nongtied. U James Nongrum u la long u nongtied uba la ïoh bun da kaba u la kamai 31 run na ki 24 bol, katba u Phiner Tang bad u Deimiki Rabon ki la ïoh mar 17 run. Na ka liang ki nongkawang bol ka Lion, u Deibormi Rngad bad u Teilang War ki la khur mar 4 wiket. Ïa ka nam Man of the Match la ïoh da u Teilang War.
Ka jingïalehkai quarter final kaba khatduh kan long mynta ka sngi Ba-ar hapdeng ka The Legends (Lissi Pearl) pyrshah ïa ka Wahïajer SC ha Khliehtyrchi Mini Stadium naduh ka por 9 baje mynstep.
