Beijing, Lber:
Katkum ki khubor, la ong ba ka China ka la sdang pyntreikam biang ia ka liengsuiñ kaba her beit-beit na Beijing sha ka nongbah Pyongyang jong ka North Korea hadien 6 snem ba la sangeh ia ka jingiatreilang hapdeng ka China bad North Korea ha katei ka bynta. Kumjuh ruh ka North Korea ka dang pynkhreh ban ioh plie biang sa ia ka leit ka wan lyngba ka rel na katei ka ri sha kawei pat.
Namar la ong ba ka China ka long ka nongkyrshan ba ratbah ia ka ioh- ka kot jong ka North Korea ha ka liang ka khaïi- ka pateng bad kaba long ruh kawei na ki daw ba kongsan jong ka jingiakyrshan ba markylliang hapdeng kitei ki arliang ri.
Watla katta, la ong ba ka jingleit jingwan hapdeng kitei ki 2 ri, ka la sangeh noh naduh u snem 2020, hadien ba la wanrah ia ka jingkhangdam namar jong ka khlam Covid-19. Kumta, ha kane ka sien pat, la ong ba katei ka liengsuiñ ba nyngkong kaba la sdang pyntreikam biang hapdeng kitei ki arliang ri, ka la mih na China ha ka por 7:58 baje jong ka step Sngi U Blei bad ka la leit poi ha ka Kad Liengsuiñ Sunan International Airport jong ka North Korea ha ka por kumba 11:00 baje jong katei hi ka step.
