Shillong, Lber 30
Hadien ar sngi ka jingkhynra ki bor pulit ka East Khasi Hills District ïa ki nongkhaïi met ne thei die met ha kiba bun ki jaka ha Shillong, la lah ban sakhi ba ha ka miet jong ka 30 tarik u Lber 2026, kiba khaïi met kiba ju ïeng ha Khyndailad, Shillong ki la don biang bad ïeng beit ha kajuh ka jaka ban leh ïa ki kam jong ki, kumba ki ju leh man ka por.
Katkum ka jingïoh ringdur la ïohi ba ha ka janmiet jong ka 30 tarik u Lber 2026, ki la don biang sa kumba 4 ne 5 ngut ki thei die met kiba ïeng ha Khyndailad, kaba dei kawei ka jaka ba long pdeng ha ki kam awria.
Lah ban kdew ba ha ka miet jong ka sngi Saitjaiñ, ki pulit ka East Khasi Hills ki la pynlong ïa ka jingkhynra ïa ka kam khaïi met ha Sor Shillong bad ha kane ka jingkhynra ki pulit ki la rah noh ïa 16 ngut ki ‘thei ba ïaid kam die met kynthup ïa 4 ngut ki pimp ne agent (ki briew kiba ïapynbeit bad ki nongleh kam awria).
Kane ka jingkhynra ki pulit ka EKH, ka dei halor ka jingïoh pdiang ïa kiba bun ki jingujor na ki nongshong shnong ba ki nongleh kam awria ki la treikam na ki jaka bapher-bapher kiba don marjan ki jaka lehniam kata ki Gurudwara bad kumjuh ruh halor ka jingnang kiew ka jingdon ki briew kiba don ïa ka jingpang HIV ha Shillong.
Ïa kane ka jingkhýnra la pynlong ha ki bynta ka surok na Khyndailad Pegasus Hotel sha Presbyterian English Service Church mar pyrshah ka SBI Main Branch, Shillong, nalor ki bynta ka surok mar pyrshah ka ophis MBOSE, Lachaumiere, Shillong bad IGP Point.
Ha kane ka jingkhynra, 16 ngut ki briew ki la shah rah na kitei ki jaka ba la kdew haneng katba ki dang leh ïa ki kam kiba dei ki kam die met bad kam awria. Saw ng?t pat na kiba shah rah ki dei ki pimp/agent kiba pynsuk bad pynwad briew (shynrang) na ka bynta ka kam leh awria, kiba shim ïa ka bynta ba kongsan ha ka jingpynbeit ïa kane ka kam bymman.
