Shillong, Lber 30
Hadien ba la saphriang ka surok hakhmat ka ophis ka Deputy Commissioner, East Khasi Hills District (EKHD) ba katei ka surok ka la pei thliew bad pra huri-hura tang da ki taïew ba la dep siang rong, la lah ban sakhi ba mynta ki la dep ban siang pynbha noh.
Ha ka jingleit buddien jong u Nongsaiñ Hima ha ka sngi Nyngkong jong ka taïew, la ïohi ba katei ka surok kaba la pra dangshen la dep ban syrdep bad siang rong biang.
Ka jingpra bad pait katei ka surok ka la saphriang sted bha ha ki rynsan social media dangshen, kaba la buh ka jingkylli sha baroh ki paidbah, ba kumno kane ka surok ka la dep pait haba ïa kane ka surok dang shu siang mynta kumba ar taïew ei-ei.
Hynrei ha ka jingleit ban buddien na ka liang u Nongsaiñ Hima pat la lah ban sakhi ba ïa katei ka surok ha pyrshah ka ophis ka DC la dep ban syrdep noh mar-mar.
Lah ban kdew ba ka jingpait katei ka surok ka dei lehse ka jingsiang rong kaba malu-mala bad kaba shu trei tang dep ha kaba tang shu jur u slap ka surok ka lah ban pait bad pra noh.
Shuh shuh haba ïoh ban ringdur ïa ka surok ha pyrshah ka Hight Court ruh ka la pait bad ym shym la pat siang rong ne pynbha haduh mynta bad kane ka lah ban ktah ïa ki kali, ki arshaka kiba ïaid lyngba katei ka surok lada jur shuh-shuh ka jingpait.
