Shillong, Lber 30
Ka Tottenham Hotspur ka la ïaid shakhmat ka jingïa-kren bad u Roberto de Zerbi, hadien ba une u manager barim ka Brigh-ton u la pynpaw ïa ka jinglong la kloi ban shimti ïa kane ka kam, la pynpaw ki khubor.
Kiba bun ki tyllong khubor ki la ïathuh ba utei u manager uba na Italy u la pynpaw ïa ka jingthrang ban shimti ïa katei ka kam bad un hap ban ap haduh ban da kut ka samoi ïalehkai. Hynrei mynta ka Tottenham ka dangïaleh ban mynjur ïa ka jingïasoi soskular.
La ong ba kane ka jingïakren ki long kiba biang bha, ha kaba ki tyllong khubor ki pyni ba ki dangiaid shakhmat ban pynurlong ïa kane ka jingïateh kular.
La sngewthuh ba ka Spurs ka la thmu ban tyrwa ïa utei u manager uba la 46 snem ka rta na ka bynta ka jingïateh kular kaba jlan bha ha kane ka klob. Kumba ka long mynta u De Zerbi u lah ban shimti ïa kane ka kam hadien ba u la mih noh na Marseille ha u Rymphang mynta u snem.
Kumba ka long mynta ka Spurs ka la don ha ka kyrdan ba khadhynñiew ha ka Premier League, ha kaba la tam shi poiñ hajrong jong u laiñ jong ka jingma ne ka relegation zone bad kam pat shym la lah ban khur jingjop mynta u snem.
Na ka liang u coach ba shipor u Igor Tudor u la mih noh na kane ka klob lyngba ka jingïamynjur lang ha ka sngi U Blei hadien tang 44 sngi ba u la bat ïa kane ka kam ha kane ka klob bad na ka liang u heh duh jong ka klob u Vinai Venkatesham bad u sporting director u Johan Lange ki la thmu ban pynmih bujli noh da uwei pat ha ka jaka jong u.
La sngewthuh ba ka Tottenham ka la rai ban ïakhlad lok noh bad u nongïalam ba shipor u Tudor hadien ba ka la shah rem da 3-0 kol ha ka Nottingham Forest ha ka sngi U Blei, hynrei ka kwah ban ai por ïa une u coach uba na Croatia namar ka jingkhlad noh jong u kpa ha ka taïew ba la lah.
Katto katne ngut ki nongkyrshan ka Totten-ham ki la pynpaw ïa ka jingpyrshah ïa ka jingthmu ban thung ïa u De Zerbi namar ka jingkyrshan jong u ïa u rang-ïalehkai barim ka Man-chester United u Mason Greenwood.
U Greenwood, 24 snem ka rta, u la mih noh na ka Manchester United ban leit ïasoh bad u De Zerbi ha ka Marseille ha u snem 2023, hadien ba la weng noh ïa ki jingkynnoh pyrshah ïa u, kynthup ïa ka jingthmu leh be-ijot bad thombor.
