Shillong, Lber 30
U khulom ksiar uba i Dr. Hamar Babiang Kharlukhi i la pruid dak naduh ki por kiba mynshwa ban pynneh pynsah ïa ki khana puriskam bad ki lariti, mynta ki la ïoh jingithuh ha ki rynsan kiba shabar ruh bad kane ka long ka burom kaba khraw eh ïa ka imlang ka sahlang ka jong ngi.
Watla une u rangbah um don shuh ha kane ka pyrthei, hynrei ki jingnoh synñiang ki jong i, ki la ïoh jingithuh mynta ha ki rynsan kiba heh jong ka pyrthei.
Kane ka burom kaba i Dr. Hamar Babiang Kharlukhi i la ïoh ka dei ïa ka khusnam 3rd Dadasaheb Phalke Motivational Award 2026 halor ka jingnoh synñiang ka jong i ban thoh bad ban thaw ïa 2 tylli ki jingrwai ‘folklore’ kiba i la ai kyrteng “Ko Lapalang” bad kawei pat ka dei “Ka Jingshad U Laiphew Doh.”
Lah ban kdew ba i Dr. Hamar Babiang Kharlukhi i la thoh ïa kine ki jingrwai naduh ki snem 1970 eiei bad la pynbha shuh shuh ïa kine ki jingrwai da ki khun ki jong ki, ha kaba ki la shna syndon da ki music video ïa kine ki jingrwai ha u snem 2024 bad 2025 bad la ai sngewbha ruh sha ki katto katne ki skulbah, ki kolej bad ki skul jong ka nongbah ba kin pyndonkam ïa kine ki jingrwai ha ki kam ai jinghikai.
Lah ban kdew ruh, ba nalor kine ki ar tylli ki jingrwai, i Dr. Hamar Babiang Kharlukhi i la thoh ruh ïa bun tylli ki jingrwai kiba ïadei bad ki bynta bapher bapher bad i dei ruh uwei na ki riew wadbniah ne researcher jong ka documentary film Mawlai ba la pynmih da ka Community Documentation Committee Mawlai ha u snem 2014 bad i dei ruh i nongthoh jong ka biopic shaphang i Meirad Nabon Sawian iba long i Khristan kynthei ba nyngkong na kane ka thaiñ ka jong ngi kaba la shim da ka Christian Multimedia Ministry, Jingïaseng Samla KJP Synod Sepngi ban pynmih kum ka phlim ha u snem 2019 kaba la ai kyrteng ‘Nabon : The Journey of Faith.”
