Shillong, Lber 30
Ka Khasi Hill Autonomous District Council lyngba u Under Secretary ha ka 27 tarik Lber 2026 ka la pynmih ïa ka hukum ban bthah ïa u Syiem ka Hima Khyrim ban lum ïa ka Dorbar Pyllun ha ka Shnong Tynring ha ka 31 tarik Lber 2026 ha ka por 1 baje nohphai sngi ha ïingdorbar shnong Tynring.
Ka Shnat Raid Tynring ha ka step jong ka 30 tarik Lber ka la lum ïa ka jingïalang ha madan shnong Tynring ban pynpaw ka jingpyrshah ïa katei ka hukum ba la pynmih ka KHADC kaba bthah ïa u syiem ban pynlong Dorbar Pyllun da kaba pynpaw ba hapoh ka shnat Raid Tynring kam ju don ka Dorbar Pyllun, hynrei ka don beit tang ka Dorbar Shnat Raid Tynring bad ka Dorbar Shnong Tynring.
Haba ïoh ban ïakren ïa u Sordar jong ka Shnat Raid Tynring u Bah Wordington Nongrum u la ong ba kane ka jingleh jong ka District Council ka dei ka jingïuhroit ïa ka hok jong ka Shnat Raid Tynring, namar katkum ka riti Synshar ka Raid, u don u Sordar, ka don ka Executive Committee bad ka don ka Dorbar jong ka Shnat Raid Tynring.
U la kynnoh ba kane ka jinghukum jong ka KHADC ka long kumba ka ïuhriot ïa ka hok bad ka riti dustur jong ka Shnat Raid Tynring bad dei halor kane ka nongrim ba ki pyrshah ïa kane ka jingbthah jong ki District Council. “Na ka liang jong ngi ngim lah ban tip ïa ka jingthmu jong ka District Council ban pynlong ïa ka Dorbar Pyllun, namar hangne nga don ïa ka sanat na u Syiem ka Hima Khyrim ban peit ïa ka synshar khadar” la ong u Bah Wordington Nongrum.
U Bah P Nongrum Secretary ka Shnat Raid Tynring u la ong ba hapoh ka Shnat Raid Tynring kam ju don ka Dorbar Pyllun, hynrei ka don beit tang ka Dorbar Shnat Raid Tynring bad ka Dorbar Shnong Tynring, kumta u la ban jur ba kim lah ban sngewthuh ïa ka jingthmu jong ka District Council ba ka bthah ïa u Syiem ban pynlong ïa ka Dorbar Pyllun hapoh ka Shnat Raid Tynring.
Shuh-shuh u la ban jur ba ka District Council kam dei ban thom da ka bor ban pynlong ïa kane ka Dorbar Pyllun ba ka la hukum ban pynlong ha ka 31 tarik Lber bad maham ba lada don kano-kano ka jingjia hapoh ka shnong Tynring, ka District Council kaba ai hukum ban pynlong ïa ka Dorbar Pyllun ka dei ban shim ïa ka jingkitkhlieh. Da kaba u la kdew ba ka Shnat Raid Tynring bad ka shnong Tynring ka don hapdeng ka suk ka saiñ.
Kham hadien u Bah Wordington Nongrum u Sordar, ha ryngkat u Bah P Nongrum Secretary Shnat Raid Tynring ki la phah da ka jingthoh sha u Executive Member ba peit ïa ka kam Elaka ban phah pyndam noh ïa ka jingbthah jong ka District Council, ha kaba na ka liang jong u EM u la kular ban pynsangeh ïa ka Dorbar Pyllun kaba la bthah ïa u Syiem ban pynlong ha ka 31 tarik Lber 2026.
