Ka shongkha khleh ha ka jaitbynriew jong ngi ka pyntroiñ ïa ka dustur ka riti ka jaitbynriew. Ka pynduh noh ïa u symbai paka ka jaitbynriew. La mih bujli noh u symbai shiteng ym shuh u symbai nylla ka jaitbynriew. Ki briew ruh kim dei shuh tang ka snam Khasi ki la ïa khleh ka snam shiteng ne kita ki khun shiteng ne shi-piah.
Ha ka shongkha shongman ki la ïa khleh ha ka synshar khadar ruh ki la sdang kñieh ïa ka hok jongngi ki riewlum, yn leh kumno haba ngi la ïa kwah hi namar ngi la pdiang sbun ha ka shongkha, te kan eh aiu ïa kiwei kiwei ki rukom leh rukom bat dustur ha ka jaitbynriew jongngi ruh kin kylla, namar u nongwei ula ioh kurim ki jaitbynriew trai ri, trai muluk, u ioh de sa ïa ka jait ka kynja, ki la ioh ID Card ban thep vote ki rashon card bad wat ïa ki jaka puta ka bym dei ïa ki bym dei Khasi ban ioh.
Te ka snap kyrpang bad ka hok ki trai ri trai muluk riewlum shano kan poi haba kumne. Te mano ba pynioh ïa kine, hato ka dei ka sorkar ne dei pynban ki briew jong ngi hi kiba pdiang kylluid ïa kiba wan shongkha shongman bad kiba wan rung lyngba ka niam ka rukom ki la pynshoh jingieit ha ki briew jongngi ban pdiang ïa ki kum, ki pyrsa, ki kynum, ki kpa ki khun bad kiwei kiwei. Ka jaitbynriew kaba ai lad ïa u nongwei ban rung ha rympei kan jot ei hangne ha sla pyrthei. Ka la dei ïa ngi mynta ban pyrkhat jylliew na ka bynta ka lawei ka ri bad ka jaitbynriew ban ym biej spah biej pisa ban lait na kiba bun ki jingma ïa ka jaitbynriew.
C. B. Iawphniaw
