Shillong, Lber 30
Arngut ki samla kila duhei noh ïa la ka jong ka jingim katba uwei u la lait im hadien ba ki la hap sha kawei ka riat kaba jylliew da ki spah meter kaba don ha ka thaiñ Rapleng, kaba hap hapoh ka Mawkynrew C&RD Block ha East Khasi Hills.
Katkum ka khubor kaba la ïoh lum la ong ba ka jinghap sha kane ka riat bad duh ïa la ka jong ka jingim ka dei ha ka por ba ki dang ïalehkai hajrong lum bad kyndit kynsan ka helmet ka la tyllun bad ki la ïa beh nadien ban kem hynrei jlang ki la hap lang shapoh kane ka riat.
Ka khubor ka la ïathuh ba kane ka jingjia kala jia ha ka 29 tarik mynta u bnai. Kine kiba la khlad ki dei kiba la tip kyrteng kum u Rishan Rani ba dang 23 snem bad u Ericfortis Kharkongor ruh ba dang 23 snem, kiba dei na ka shnong Langkyrding, Nongmensong, Shillong.
Shuh shuh la ïathuh ba ki lai ngut shi paralok kila leit kai sha kane ka jaka da ki ar tylli ki arshaka bad katba ki dang ïashongkai bad ïalehkai, ka helmet ka la tyllun bad ki la beh nadien ha kaba ar ngut ki la hap lang shapoh ka riat, katba uwei pat u la hap bad sahkut tang harum khyndiat bad lait im.
Ka kynhun Search & Rescue Team bad ki pulit hadien ba ki la ïoh jingtip kila ïa hiar mardor sha katei ka jaka bad kila ïoh ban sei noh ïa ki ar tylli ki metïap ha ka sngi Nyngkong.
