Kolkata, Lber:
Haba pynjur ïa ki jingkynthoh jur ïa ka seng BJP, ka Myntri Rangbah ka West Bengal bad ka heh nongïalam jong ka Trinamool Congress ka Mamata Banerjee ha ka sngi U Blei ka la kynnoh ba ka seng BJP kan pynjari ïa ki kyndon ha ka jingjied jingbam jong ki briew lada kan wan ha ka bor synshar ha kane ka jylla ha ka elekshon sha ka dorbar thawaiñ ka jylla ban wan.
Kane ka jingkren jong ka ka long hadien shisngi ba u Myntri ka tnat ki kam pohïing jong ka sorkar pdeng u Amit Shah u la pynmih ïa ka jingmudui pyrshah ïa ka sorkar Trinamool Congress kaba dang bat ha ka bor synshar.
Haba kren ha ka jingïalang elekshon ha Manbazar ha Purulia distrik, ka Banerjee ka la ong, “Ki briew kin ym lah ban bam dohkha, doh bad pylleng katkum ka jingkwah jong ki lada ka BJP ka wan ha ka bor ha ka jylla.
Ka BJP ka la dep ban khang ïa kine ha ki jylla ba ka synshar. Phi dei kaei kaba phin buh kyndon halor ka jingjied jingbam jong ki briew?”
“Baroh kine ki jingbam ki long kiba riewspah ha ka protein, bad ka jingkoit jingkhiah jong phi kan nang sniew lada buh kum kine ki jingpyrkhing. Hato phi ruh phin rai ïa kino ki tiar tem, ki drum, ki harmonium, ki wistle, ki guitar, ki sitar, nga dei ban tem?” ka la bynrap.
Ka la ong shuh shuh ba u Amit Shah hi u dei ban “shah pynngat ha ki kam ba u la leh mynshwa”.
Ka Banerjee ka la kynnoh ruh ba lada ka BJP ka wan ha ka bor, kan pynsangeh noh ïa ka skhim ‘Lakshmir Bhandar’. Ka la kynnoh ba 1.2 klur ngut ki kyrteng jong ki nongthep vote ki la shah pyndam noh na ka thup nongthep vote hadien ka Special Intensive Revision (SIR) ha shwa ka jingthep vote.
Ka Myntri Rangbah ka jylla ka la kynnoh ruh ba ka don ka jingpynkhihwin jong ka saiñpyrthei ha lyndet jong ka jingïakynad dang shen ha Murshidabad’s Raghunathganj ha ka jingïaid proseshon Ram Navami bad la kynthoh ruh ïa ka tnad elekshon kaba la pynkynriah kam ïa ki heh pulit hashwa ka elekshon.
Hadien kane, ka la ai jingkren ha kawei pat ka jingïalang ha Raipur ha ka distrik Bankura, ha kaba ka la pynpaw biang ïa kijuh ki jingkynnoh pyrshah ïa ka BJP bad ka kynhun ba dei khmih ha ki kam elekshon.
U Shah u la ong ba ka elekshon ban wan ha West Bengal kam dei tang ka jingïakhun ha ka kyrdan jong ka jylla hynrei ka long kaba kongsan bha na ka bynta ka jingshngaiñ jong ka ri, da kaba kynnoh ïa ka sorkar jylla ba ka ailad ïa ka jingwan rung tuh.
“Ka Mamata didi ka ju ïalehkai kum ka victim card ha ka por elekshon. Teng teng ka kren shaphang ki kjat kiba la kheiñ lane ki ‘jingmynsaw ha ka khlieh’, bad teng teng ka kynnoh ïa ka Election Commission.
Hynrei ki paidbah ka Bengal mynta ki la sngewthuh ïa kane ka saiñ hima sima jong ka victim-card,” ong u Shah ha ka jingïalang bad ki nongthoh khubor ha Kolkata.
