Shillong, Lber 30
Ka Jaiñtia Students’ Union (JSU) ha ka Lah Sngi U Blei ka la kyrpad ïa ka jingtuklar jong u Lat ka Jylla, u C.H. Vijayashankar ban kyntu ïa ka Sorkar Pdeng ha ka ban thaw ïa ka aiñ ba pura – ka ‘National Anti-Discrimination Law’ (NADL) ban tehlakam ïa ka jingkren beiñ jaidbynriew bad ka jingthombor pyrshah ïa ki briew na ka Thaiñ Shatei Lam Mihngi ka Ri India.
“Ngi la kyrpad ba dei ban shimkhia mardor ban weng ïa ki jingjia kiba nang jur ba ïadei bad ka jingthombor kaba ki briew ka Thaiñ Shatei Lam Mihngi ki mad ha kylleng ka Ri, bad ban thaw ïa ka aiñ ba pura – ka ‘National Anti-Discrimination Law’, ban pyntikna ïa ka jingshngaiñ, ka burom, bad ka jingïada jong ki,” ong u nongai buit ka JSU, u Bah A. Suchiang hadien ba la pdiang ïa ka dorkhast ka seng da u Principal Secretary sha u Lat ka Jylla.
U la ong ba ki jingjia kum ka jingshah pynïap u Nido Tania, ka jingbym ïoh hok u Angel Chakma, bad ka jingshah kren beiñ ba dang shen jong ki 3 ngut ki kynthei ka Arunachal Pradesh ka pyni ïa ka jingeh kaba la suh thied ne kaba jia na ka por sha ka por – ba ki jingkular ka Riti-Synshar katkum ka ‘Article’ 14 bad 15 kim shym la sangeh.
“Ka jingïaryngkat lang kam dei ka jingïoh myntoi – ka dei ka hok ka Riti-Synshar. Ka jingpynslem ban pynïoh ïa ka jingbishar hok ka dei ka jingpynduh noh ïa ka hok,” ong u Bah Suchiang.
Ka seng ka la tyrwa ïa ki jingpynshitom ba la buh kyrdan na ka bynta ki kam runar ba ïadei bad ka jingkren beiñ jaidbynriew – haduh hynriew bnai na ka bynta ka jingkren beiñ, lai snem na ka bynta ka jingthombor, bad ka jingset patok shi jingim ne ka rai pynïap lada ki jingthombor ki ïalam sha ka jingïap – bad dawa ïa ka Sorkar Pdeng ban leh eiei mardor ban pyntikna ïa ka jingshngaiñ bad ka burom na ka bynta ki nongshong shnong ka Thaiñ Shatei Lam Mihngi ha kylleng ka ri.
“(Ngi) la tyrwa ba ka ‘National Anti-Discrimination Law’ ka dei ban kynthup ïa ki kyndon kiba khlaiñ bad kiba kyrpang ban khanglad ïa kum kine ki kam bad ban pynïoh ïa ka hok ha ka rukom kaba paka. Kine ki kynthup ïa: Ka jingkren beiñ jaidbynriew da ka ktien lane ka jingpyndonkam ïa ki kyntien pynjah burom – dei ban pynshitom da kaba set patok haduh 6 bnai ryngkat ka jingdaiñ kuna. Ka jingthombor kaba la pynlong da ka jingisih jaidbynriew – dei ban pynshitom ha ryngkat ka jingset patok haduh 3 snem ryngkat ka kuna. Ka jingpynïap briew ne ka jingthombor kaba ïalam sha ka jingïap briew kaba la pynlong da ka jingisih jaidbynriew ka dei ban khring ïa ki jingpynshitom kiba tyngeh tam, kynthup ïa ka jingset patok shi jingim ne wat ka jingpynshitom da kaba rai pynïap, katkum ka jingkhraw jong ka kam,” ong u Bah Suchiang.
“Ngi ngeit skhem ba kum kane ka aiñ kan ym long tang kum ka jingkhanglad hynrei kan phah ruh ïa ka khubor kaba khlaiñ ba ka jingthombor ne ka jingkren beiñ jaidbynriew kam don jaka ha kane ka ri kaba ïar bad ba synshar paidbah. Ngi kyntu ïa ka Sorkar India ban shimkhia mardor bad ban pynneh ïa ka jingkular ka Riti-Synshar jong ka jingïaryngkat lang, ka burom, bad ka hok na ka bynta baroh ki nongshong shnong, kynthup ïa kito kiba na ka Thaiñ Shatei Lam Mihngi,” u la ong.
