Shillong, Lber 30
Ha kawei ka jingjia ba sngewsih, uwei u rangbah bad kawei ka longkmie kiba shong ha ka thuk-thuk ki la mad ïa ka jingjia aksiden ha ka janmiet jong ka sngi Nyngkong ha ka por 3 baje tam eiei ha surokbah 5mer ha Upper Shillong.
Ki paidbah ba ïohi ïa kane ka jingjia aksiden ki ïathuh ba la ñiah ïa katei ka thuk-thuk kaba don ïa u ML 05 5976 da u rangbah ha ryngkat ka longkmie ba shong lang hadien, kane ka thuk-thuk ka dei ka ba wan na ki bynta ka 7mer bad haba poi ha katei ka jaka ka la kum leit tynrah nadien ïa kawei ka kali Mahindra XUV500 kaba don ïa u registration number ML 05 L 0008 kaba wan na kajuh ka laiñ bad kaba thmu ban jam sha shiliang ka laiñ jong ka surok.
U nongñiah katei ka thuk-thuk u la mynsaw jur na ki bynta jong ka khmut bad ka shyntur katba ka longkmie kaba shong nadien ka la mynsaw malu mala.
Ki paidbah kiba lap bad ïohi ïa kane ka jingjia ki la ïarap ban pynkit noh mar-mar ïa kitei ki arngut kiba ngat ha ka jingjia aksiden, sha jaka sumar na ka bynta ban ïoh ki lad jingsumar.
