Shillong, Lber 30
U nongïalam ka Bharatiya Janata Party, Meghalaya uba dei ruh u MDC jong ka South Tura Constituency u Bernard Marak ha ka sngi Nyngkong u la dawa na u Lat ka Jylla ban pyntreikam ïa ka Special Intensive Revision (SIR) hapoh ka Ri-lum Garo.
Kane ka jingdawa pyntreikam ïa ka SIR ka wan hadien ba u Lat ka Jylla u la ai jingmynjur ban pynlong kongsan (Mandatory) ïa ka syrnod ST na ka bynta ka ilekshon GHADC ha kaba mynta ka la don ka Committee ba kyrpang ban khmih bniah ïa ka Electoral Roll.
Haba kren sha ki nongthoh khubor u Bernard u la ong ba kane ka jingdawa ban pyntreikam SIR ka dei bha ha ki thaiñ ri thor (Plain) ka Ri-lum Garo, namar ka thaiñ ka la sakhi ïa ka jingjur ka jingwan buhai shnong kaba la pynartatien, la ki dei ne em ki nongshong shnong ba pura jong ka Ri India.
U Bernard u la ong ba ka jingsdang bunpaid ha ki them jong ka Ri-lum Garo ka buh jingma ïa ki trai Jylla namar tang hapoh 5 snem, ki don ki Constituency kiba la kiew ka jingdon ki nongthep Vote na ka 5000 ngut sha ka 10,000 ngut bad don kiba la kiew haduh 11,000 ngut.
“Namar ba ngi sngewkhia ïa ka jingwan buhai shnong be-aiñ hapoh ka thaiñ, ngi la pynsngew sha u Lat ka Jylla ba ka long kaba donkam eh ban pyntreikam da ka SIR ha ki them jong ka Ri-lum Garo khnang ban pynthikna ïa ka jingshngaiñ ki trai riewlum jong ka thaiñ,” la ong u Bernard.
U Bernard u la kam ba ka jingwan buhai shnong ki briew ba nabar ha ki them ka Ri-lum Garo ka buh jingartatien, la ki dei ne em ki nong India namar ki don bun ngut kiba dei ki phetwir na ka ri Bangladesh.
U la kynnoh ruh ba ki briew ba sah ha ki them ka Garo ki don 2 tylli ki Epic Card, kata jong ka Jylla Meghalaya bad jong ka Jylla Assam. “Namar kata ka jingpyntreikam ïa ka SIR kan pynthikna ba tang kiba dei hok ki nongshnong shnong ka Jylla Meghalaya kin lah ban thep Vote ha ka ilekshon” ula ong.
