Shillong, Lber 30
U Bah Titosstarwell Chyne uba dei u Nongïalam ka Liang Pyrshah ha Khasi Hills Autonomous District Council (KHADC) u la ong ba ki dkhot ka Liang Pyrshah ki kwah ban tip balei u Chief Executive Member (CEM) Bah Winston Tony u la pynsangeh treikam ïa u Secretary ka Executive Committee.
Haba ïakren bad ki nongthoh khubor ha kine ki sngi u Bah Titos u la ong ba ki MDC ka Liang Pyrshah ki la kwah ban ïakynduh ïa u CEM ban pan jingshai balei ki pynsangeh treikam ïa u Secretary Bah DG Syiemiong.
U la ong ruh ba ki MDC ka Liang Pyrshah ki kwah ban tip balei u Standing Council ruh u iehnoh ïa kane ka shuki.
“Haba ngi la kwah ïakynduh ha ka 26 tarik mynta u bnai u ong ba um lait namar ba u don ki kam shimet hynrei haba la buh ha ka 27 tarik mynta u bnai ha ka por 12:30 mynsngi u khlem wan hynrei ngi la ap haduh 2;30 janmiet ruh u khlem poi kane ka la pynlong ïa ki para MDC ba kin nym lah shuh ban ap namar ki don ki kam ba kyrkieh,” u la ong.
U la pyntip ba u CEM u la ai daw ba ka jingpynkynriah ïa ka por na ka 12:30 mynsngi u la dep phah khubor lyngba ka phone hynrei u Bah Titos u khlem ïoh ïa kata ka ‘message’.
Shuh shuh u la ong ba ki MDC kiba don ha ka Liang Pyrshah kim kwah ban ïakren ïa ka jingeh jong ka council tang ha ki lad pathai khubor hynrei ki kwah ban ïatei ïa ka council da kaba ïakynduh markhmat ïa u CEM hynrei lada kim ïoh ïakynduh ka shem shitom ïa ki ban ai jingmut.
U la ban biang ba ka jingpynsangeh treikam shipor (suspend) ïa u Secretary ka Council ka dei kaba ki paidbah bad ki MDC ki kwah ban ïoh jingshai namar kane ka kam ka long kaba khia.
U la ong ba ka kam kaba khia bha ka dei hadien ba u Lat ka Jylla u la mynjur ïa ka AD Rule ha Garo Hills Autonomous District Council ban shah ïakhun ilekshon tang ïa kiba don syrnod Schedule Tribe.
U la ban biang ba ha KHADC ruh donkam ban pynkylla noh ïa ka AD Rule namar ha KHADC lada pynkylla hap ban ïatai bha namar bun bah ki jaidbynriew kiba don syrnod Schedule Tribe khnang ban nym buh jingeh hadien habud.
