Kolkata, Lber:
Ka seng Congress ha ka sngi U Blei ka la pynmih ïa ka thup ba nyngkong jong ka kaba don 284 ngut ki kyrtong na ka bynta ka elekshon sha ka ïingdorbar thawaiñ jong ka West Bengal ban wan.
Lah ban kdew hangne ba u khliehduh barim ka seng ha ka jylla u Adhir Ranjan Choudhury u la shah pynïeng na ka Baharampur konstitwensi.
U MP barim ka Rajya Sabha na TMC u Mausam Noor uba la pynïasoh sha ka Congress shwa ka elekshon u la shah pynïeng kyrteng na Malatipur.
Kiwei pat ki kyrtong kiba pawnam ki long u Madhap Rai na Darjeeling, u Abdul Hannan na Sujapur, ka Susmita Biswas na Dum Dum, u Gautam Bhattacharya na Diamond Harbour, u Souvik Mukherjee na Asansol Dakshin bad u Prasenjit Puitandi na Asansol Uttar.
Ka seng ka ïaid marwei ha ka jingthep vote na ka bynta ki 294 tylli ki dorbar thawaiñ ha ka jylla, ka ban long ha ki ar bynta ha ka 23 bad 29 tarik u Ïaïong, bad yn ñiew ïa ki vote ha ka 4 tarik u Jymmang.
Kane ka jingpynbna ïa ki kyrtong ka long hadien shisngi ba ki nongïalam ba hakhlieh duh jong ka Congress ki la pynlong ïa ka jingïathir jingmut kaba bniah halor ka thup kyrteng na ka bynta ka elekshon sha ka ïing dorbar thawaiñ jong ka West Bengal ban wan ha ka jingïalang jong ka Central Election Committee (CEC) hangne.
U President ka seng Congress u Mallikarjun Kharge bad u heh barim ka seng u Rahul Gandhi, ryngkat u General Secretary jong ka AICC, ka Organisation, u K C Venugopal bad ki nongïalam na West Bengal ki la don lang ha kane ka jingïalang.
Ki nongwan kiba pawkhmat ki kynthup ruh ïa u heh barim jong ka seng Congress ha West Bengal u Adhir Ranjan Chowdhury bad ki dkhot jong ka CEC — ka Ambika Soni, u Madhusudan Mistry, u Salman Khurshid, u T S Singhdeo, u K J George, u P L Punia bad ka Amee Yajnik, nalor kine u AICC in-charge na ka bynta ka West Bengal, u Ghulam Ahmed Mir.
U Mir u la ïathuh ha ki nongthoh khubor ba ka seng ka la ïoh pdiang haduh 2,500 tylli ki aplikeshon na ka bynta ki 294 tylli ki shuki dorbar thawaiñ.
“Ngin ïakhun ïa baroh ki 294 tylli ki shuki dorbar thawaiñ ha West Bengal, ban ym iehnoh thylli ïa kawei ruh. Kane ka dei ka jingkwah jong ki nongtrei bad ki rangbah jong ngi ha ka jylla naduh kaba sdang. Ngi la ïoh 2,500 tylli ki aplikeshon na ka bynta kine ki 294 tylli ki shuki,” la ong u Mir.
