Jerusalem, Lber:
U Myntri Rangbahduh ka Israel, u Benjamin Netanyahu, ha ka Sngi Nyngkong u la ong ba u la ioh ban iakren bad u President ka US- u Donald Trump, ha kaba u la ong ba u President ka US u ngeit skhem ba ka jingioh nong jong ka tnat shipai ka US bad Israel hapoh Iran, ka lah ban iapoi sha ka jingiakren bad jingiapynbeit ka ban ym wanrah jingktah ne jingduhnong ia ka Israel.
“U President Trump u ngeit ba ka don ka lad ban pyndonkam ïa ki jingjop ba khraw jong ka IDF bad ki shipai jong ka US khnang ban pynurlong ïa ki jingthmu jong ka thma ha ka jingïateh kular — ka jingïateh kular ka ban ïada ïa ki jingmyntoi ba kongsan jong ngi,” ong u Netanyahu ha ka jingpynbna video.
“Ngin iada ïa ki jingmyntoi ba kongsan jong ngi ha kano kano ka jinglong jingman,” u la ong bad bynrap, “Ha kajuh ka por, ngi dang bteng ban thombor ha Iran bad ha Lebanon.”
U Netanyahu u la pynpaw biang ba ki jinghiar thma kiba dang ïaid shakhmat ki “pynpra ïa ka prokram missile bad ka prokram nuclear” jong ka Iran bad ruh “ki pynjulor jur ïa ka Hezbollah”.
“Tang katto katne sngi mynshwa ngi la pynduh noh sa arngut ki stad nuclear (na Iran), bad kane kam dei ka jingkut”, u la ong. Kane ka jingkren jong u Netanyahu ka la mih shen hadien ba u Trump u la pynbna ïa ka jingïakren kaba bha kaba myntoi bad uwei u heh sorkar Iran u bym shym la pynpaw kyrteng.
Ka jingkylla kynsan jong u Trump sha ka kam ïadei bad ka jingïadei, ka la jia tang katto katne kynta shwa ïa ka jingbthah jong u, kaba la pynjlan mynta ha ka miet jong ka sngi Nyngkong, ba ka Tehran, ka dei ban plie biang ïa ka lynti kit lieng jong ka Strait of Hormuz, lane lym kumta, kan ïohi ba ki shipai jong ka US, kin “pynduh” noh ïa ki jaka pynmih bor ding jong ka.
