Shillong, Lber 30
Ka Seng Khasi Kmie ha ka sngi Nyngkong jong ka taïew, ka la lah ban pynlong ïa ka lehniam Pynkiew Ksing/Sei Ksing, kaba long kum shi bynta ka byrta ka shula sha la ki parakur parakha sawdong ka Bri Hynñiewtrep, ba ka samoi jong ka shad ka kmen kane ka la wan ba kan poi, ha kaba u khun bynriew, kum shi bynta ban ainguh ïa u Blei Trai Kynrad, un pynkhreh ban hiar lympung shad ban pyndep ïa ka Shad Suk Mynsiem.
Mynta ka kynti ka Shad Suk Mynsiem kan long ha ki lai sngi kata ha ka 11, 12 bad 13 tarik u Ïaiong 2026.
Ka jingpyndep ïa kane ka lehniam Kiew Ksing ka la long hakhmat ka hall ka Seng Khasi Kmie, kaba don ha Mawkhar Shillong, ha kaba la pyndep ïa ka nguh ka dem ka shad ka kheiñ, ka khnong ka bishar da ka kynhun u Riew Tymmen Riewsan ka Seng Khasi hapoh ka jingïalam u Rangbah Donbokstar Kurkalang.
Shuwa ban leit sha ka nguh ka dem, la ïoh ïa ka jingkren pdiang sngewbha ba la ai da u Vice President Seng Khasi Kmie, Rangbah D.L Nongbri, bynrap sa ka jingkren na u President Seng Khasi Kmie u Rangbah O.Pyngrope.
Hadien ba la dep ka nguh ka dem, ka kynhun ki duhalia ba dei na ka kynhun ‘La Syrdoh’ ki la shim ïa ka bynta ban tem ïa baroh ki 7 tylli ki skit ha kaba dei artad kane ka kynhun ka ban tem ban put ha kane ka shad mynta ka snem.
Hadien kane, la ïoh pat ïa ki kyntien ai khublei ba la ai da u Cultural Secretary Seng Khasi Kmie, Rangbah Hamar S Kharhmar. La wan ban sakhi bad pynshit pynshngaiñ ïa kane ka sngi da ki dkhot ka Jylli Pyrkhat Kam (JPK) Seng Khasi Kmie, ki dkhot ka Seng Kynthei, ki parakur ki parakha bad ki khun samla.
Dei naduh kane ka sngi ba la dep ban Pynkiew Ksing/Sei Ksing, ba ka Seng Khasi man la ka janmiet kan pynlong ïa ka jinghikai bad batai shaphang ka shad suk mynsiem, ka ban ïai bteng ter-ter tad haduh ban da poi sha ka sngi ban hiar lympung ban pyndep ïa ki lai sngi jong ka shad.
