Shillong, Lber 30
Ka Sohra Combine bad ka Mawphlang CC ki la long sa kiwei pat ki kynhun kiba la lah ban pynthikna ban jam sha ka semi final ha ka lympung ïalehkai 5th District League T20 Cricket Tournament 2026 ba la pynlong da ka East Khasi Hills Cricket Association ha ka lah sngi U Blei.
Ha ka jingïakhun quarter final kaba la long ha madan Saitsohpen kaba ha Sohra, ka Sohra Combine ka la pynliem noh ïa ka Laitkynsew MC da 6 wiket. Ka Laitkynsew kaba la kam trai ban tied nyngkong ka la kamai 141 run bad shah pynkhyllem baroh ki nongtied ha ki 16.5 over. U Mebanrikupar Malngiang u la tied 43 run na ki 29 bol. Katba u Shanborlang Kharshiing u la khur 5 wiket na ka bynta 17 run ha ki 3 over.
Haba wan shimti ïa ka pali kaba ar, ka Sohra Combine ka la lah ban kynjoh sha ka thong da kaba kamai 144 run bad shah pynhap 4 wiket ha ki 16 over. U Donkyrmen Nadon u la tied 47 run na ki 27 bol. Katba u Pynskhem Phawa u la khur 2 wiket na ka bynta 31 run ha ki 3 over. Ïa ka nam Player of the Match la khur da u Shanborlang Kharshiing.
Haba phai sha kawei pat ka jingïakhun quarter final kaba ar, ka Mawphlang ka la jop da 4 wiket ïa ka Laitjem CC. Ka Laitjem kaba la shimti ban tied nyngkong ka la kamai 136 run bad shah pynkhyllem baroh ki nongtied ha ki 18.4 over. U Anthony Kharwar u la tied 22 run na ki 11 bol. Katba u Janai u la khur 4 wiket na ka bynta 18 run ha ki 4 over.
Haba wan beh ïa ka thong, ka Mawphlang ka la kamai tang 137 run bad shah pynhap 6 wiket ha ki 17.5 over. Kane ka la wan lyngba ka jingïalehkai bha u Saiñdorlang Ripnar uba la ïoh ban khyrwit ïa ka shiteng spah kaba 76 run na ki 32 bol. Katba u Doril June Pathaw u la khur 2 wiket na ka bynta 17 run ha ki 4 over. Ïa ka nam Player of the Match la khur da u Saiñdorlang.
Lyngba kine ki jingjop, ka Sohra Combine bad ka Mawphlang kin pynkhreh ban ïakhun pyrshah ïa ka Cricket Smit bad Friends United ha ka semi final ka ban long ha ka 1 tarik u Ïaïong.
