Shillong, Lber 30
Ka Jylla ka la khur biang sa kawei ka takma rnong lyngba u nongïalehkai ïalympat, u Juh Pa U Juh Nongtdu ha ka Khelo India Tribal Games 2026 kaba dangïaid mynta ha Chhattisgarh.
Une u rangïalehkai u la lah ban khur ïa katei ka takma ha ka kyrdan ïalehkai jong ka 60kg Greco-Roman Wrestling ha ka lah sngi U Blei. Kane ka long ka jingjop kaba nyngkong eh ïa ka Wrestling jong ka Jylla ha katei ka lympung namar wat ha i por ba lyngkot eh ba ki la ïoh ban pynkhreh ki la lah ban pynpaw ïa ka jingtbit kat haduh ban ïoh khur ïa katei ka takma.
U Juh Pa U Juh u dei u rangïalehkai uba dangshah pyntbit hapoh ka ‘Team Preparation’ na ka bynta ka 39th National Games ka ban long ha u 2027 ha Meghalaya.
Nalor u Juh Pa U Juh, ka Jylla ka la phah ïa kiwei pat ki ar ngut ki nongïa-lehkai ban shim bynta ha katei ka lympung kiba kynthup ïa ka Ribhalang Sun (50kg) bad u Jeff Gary Diengdoh (65kg), hynrei kine ki la shah rem noh ha ka semi final.
Na ka liang u Presi-dent ka Meghalaya Wres -tling Association u Bah Isaiah Kharmawphlang u la pynpaw ka jingsngewkmen halor kane ka jingjop u Juh Pa U Juh Nongtdu. “Kum ka synjuk ngi da sngewkmen eh namar kane ka long ka takma kaba nyngkong eh ban khur ha ki lympung ïalehkai national. Ngi la ïoh ban pynkhreh tang kumba saw bnai hynrei ngi la lah ban sei u rangïalehkai ba kynsai ban wanrah burom ïa ka Jylla.”
“Ha ka jingshisha ngi la phah lai ngut sha katei ka lympung, hynrei kiwei pat ki ar ngut ruh ki la lah ban ïalehkai bha bad ki la poi shaduh ka semi final hashwa ba kin shah rem noh,” u la bynrap.
Haduh mynta ka Meghalaya ka la lah ban khur haduh lai tylli ki takma rnong. Ïa kine ki takma kiba la khur kham hashwa da ka nongjngi ka Verem Gedaliah Nongsiej ha ka Women 50 meters Freestyle lem bad ka Larityngkai Lawriniang ha ka jingïakop rahnar ne weightlifting jong ka jingkhia kaba 53kg.
