Shillong, Lber 30
Ka ‘thei apkol ka Jylla ka Ribansi Jamu ka la shah kynthup biang hapoh ka kynhun ïalehkai U-20 ka ri India na ka bynta ka AFC U-20 Women’s Asian Cup Thailand 2026, hadien ba u coach ka kynhun u Joakim Alexandersson u la pynbna ïa ki kyrteng ki 23 ngut ki ‘thei ïalehkai ha ka lah sngi U Blei.
Ka India, kaba la ïoh rung biang sha kane ka lympung hadien 20 snem, kan sdang ïa ka jingïalehkai kaba nyngkong pyrshah ïa ka Japan ha ka 2 tarik u Ïaïong ha Thammasat Stadium, ha kaba yn pynbud sa ka jingïakhun pyrshah ïa ka Australia ha ka 5 tarik ha Pathum Thani Stadium bad ïa ka Chinese Taipei ha ka 8 tarik ha Pathum Thani Stadium.
Kat kum ka kyrwoh ba la ong ba ki ar tylli ki kynhun ki ban wan ha ki kyrdan ba hakhlieh na kawei pa kawei ka group lem bad ar tylli kiba kynsai ki ban wan ha ka kyrdan balai, kin rung sha ka quarter-final. Ki saw tylli ki kynhun ki ban khur jingjop ha ka quarter-final kin ïoh rung sha ka FIFA U20 Women’s World Cup Poland 2026.
Kumba ka paw kane ka kynhun ka la poi ha Bangkok ha ka 20 tarik mynta u bnai, bad ki la don 13 sngi ban pynïahap bad ka jinglong ka mariang ha katei ka jaka. Ka kynhun ïalehkai kaba leit ka kynthup ïa 24 ngut ki nongïalehkai, ha kaba la pyllait noh ïa ka ‘thei ïalehkai ‘dien ka Alka Indwar bad na ka liang u Alexandersson u la pynskhem beit tang 23 ngut ki nongïalehkai sha kane ka lympung.
Ka India ka la sdang ïa ka jingkilanmet ha Bengaluru naduh u Kyllalyngkot hadien ba la pynkut shwa ïa ka wat kaba nyngkong jong ka IWL. Hadien kata, ka la ïashim bynta ha ki san tylli ki jingïalehkai paralok bad ki klob kiba na Sweden. Hadien ba la wanphai na Scandinavia, ka India ka la bteng biang ïa ka jingkilan met ha Kolkata hashwa ba kan mih ban leit sha Thailand.
Kumba ka paw ka Ribansi kaba na Ri Bhoi District, ka la sdang ïa ka jingïaid lynti da kaba ka la ïalehkai na ka Laitkor Rngi SC ha ka Women’s Football League ba la pynlong da ka Shillong Sports Association. Hadien ka la leit ïasoh sha ka Baichung Bhutia Football Schools Residential Academy ha Nashik, Maharashtra. Ka la ïalehkai ruh na ka Football Delhi ha ka 28th Rajmata Jijabai Trophy nalor kiwei pat bad lyngba ka jinglah ban pynpaw ïa ka jingtbit ka la shah jied ban mihkhmat ïa ka ri India ha ki lympung ïalehkai shabar ri.
