Shillong, Lber 30
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh kiba dang shen na kylleng ki bynta jong ka sor Shillong bad na kiwei ki jaka ruh kumjuh.
Katkum ka khubor na ki pulit la ong ba ka Kong Mini Marbañiang kaba na Riat Laban Kynjat Football, Shillong ka la ai ka jingujor ba ha ka 27 tarik mynta u bnai, ki runar bym lah ban ithuh, ki la tuh ïa ki tiar bording na ka ïing building kaba dang shna.
Katba u Komarson Lyngkhoi u la ai ka jingujor ha ka 28 tarik mynta u bnai, ba ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AD-0334 na ka thaiñ McDonald Road, Shillong.
Ha kawei pat ka khubor, ka Mary Lalthazo ka la ai ka jingujor ba ki runar bym lah ban ithuh, ki la tuh ïa ka arshaka ka jong ka, kaba don ïa u registration number ML05-AG-5470 na ka thaiñ Mawblei, Shillong.
Ha kawei pat ka khubor, ki pulit ki la ïoh jingtip ba ha ka 27 tarik mynta u bnai, ar tylli ki arshaka kiba don ïa u registration number ML05-AD-0334 bad ML05-AE-2921, la lap ba la shu ieh kumto ha kawei ka khlaw ha Shilliang Umshong ha East Jaiñtia Hills.
Ha kawei pat ka khubor, u Rahimul Islam u la ai ka jingujor ba ha ka 27 tarik mynta u bnai, ka arshaka jong u, kaba don ïa u registration number ML08-L-6739 la lap ba ka la jah na ka jaka ïew ha New Bhaitbari Market, West Garo Hills.
Katba na ka liang jong u Debashish Chakraborty u la ai ka jingujor ba ha ka 26 tarik mynta u bnai, ha ka por kumba 12.30 mynsngi, ki runar bym lah ban ithuh, ki la tuh ïa kawei ka tyndong lyer shet (LPG) na ka jaka sah jong u, kaba don ha Nikrang A’ding, Tura, West Garo Hills.
