Nongstoiñ, Lber 30
Kala long ka jingduh nong kaba khraw ïa ki nongri ngap ha ki bynta jong ka shnong Khliehmawlieh ha West Khasi Hills bad kumjuh ha ki katto katne ki shnong hapoh ka West Khasi Hills hadien ba ki ngap ïa kaba ma ki, ki la ri la sumar ha ki ksing ngap ha baroh shi katta, ki la ïap khlem da tip kaei ka daw.
Haba pynthikna ïa kane, u Bah Klestar Syiem na ka shnong Khliehmawlieh uba dei ruh uwei na ki nongri ngap ha katei ka shnong u la ïathuh ba katei ka jingjia jong ka jingïap ki ngap kala jia naduh kane ka taiew bala lah ha kaba man ka sngi ki ngap hadien ba ki la mih na ki jaka ri lane ki ksing ngap ki shu ïap ha kaba kane kala pynlyngngoh haduh katta katta ïa ki nongri ngap ha kaba ki la suba ba ka lah ban dei ka jingïap khlam.
Shuh shuh u la ïathuh ruh ba ha ka shnong Khliehmawlieh, ki nongri ngap kiba la ngat ïa kane ka apot jong ka jingïap jong u ngap ki kynthup ïa u Bah Shalwindar Syiem, Bah Dimanstar K.Bani bad jong u Bah Klestar Syiem na ka dong Sohmirit jong ka shnong Khliehmawlieh.
Nangta u la ong ruh ba ha ka shnong Pyndengdilion pat ki kynthup jong u Bah Bidarsing K.Bani bad jong u Bah Charles K.Bani ha kaba lada kheiñ lang ka jingïap jong ki ngap kala long na ki spah tylli ki ksing ngap.
U Bah Kles u la ong ruh ba kane ka jingïap jong ki ngap ym shym la tip na kaei ka daw bad kaei ka jingshitom, kumta ka donkam ïa ka tnad ba dei peit ba kin wan ban peit ban lap kaei ka jingshitom kaba kine ki ngap ki ïap lane kiei ki dawai ki ban lah ban ai ka jingïada khnang ba kum ki nongri kin lait na ka jingduhnong.
U la ïathuh ruh ba kane ka jingïap jong ki ngap kala jia mynta ar snem eiei bad kane kala pynduhnong shisha ïa ki nongri ngap.
