Nongpoh, Lber 30
Ha ka jingjia ïakynad kaba la jia biang ha ka thaiñ Maikhuli ka shnong ha khappud ka Jylla Meghalaya bad Assam, la ong ba u Rangbah Shnong ka Maikhuli lem bad arngut ki khun jong u bad katto katne ngut ki nongkitkam shnong ki la shah shoh shah dat ha ki briew na Assam na ka shnong Bengali Basti.
Katkum ka khubor, la ong ba kane ka jingjia jong ka jingshah thombor jong u Rangbah Shnong lem ki khun jong u bad katto katne ki nongkitkam shnong ka la jia ha ka 29 tarik Lber, 2026.
Lah ban kdew, ba ka jingïakynad hapdeng ki nongshong shnong ka thaiñ Maikhuli ha khappud jong ka Ri Bhoi District bad ka Assam ki la ïai mad ïa ki jingjia kiba ktah ïa ka shongsuk shongshngaiñ tang namar ka jingïakynad halor ki kam pynroi khamtam ha kaba ïadei bad ka pung dohkha (fishery pond) jong ka Maikhuli ïa kaba la pynhap sha Assam ha ka jingïasoi ïa ka MoU hapdeng ka Sorkar Meghalaya bad Assam.
Katkum ka jingïathuh da u Nicholas Marak, Rangbah Shnong ka Maikhuli, la ong ba ha ka step jong ka 29 tarik Lber, la don katto katne ngut ki briew kiba la khot sngewbha ïa u khun jong u, u Sangwat J Sangma bad u Ricky J Sangma sha ka jaka khawai ha Bengali Basti ka shnong kaba hap ha Assam, hynrei ha ka por ba u dang thmu ban wanphai sha la ïing, ki khun jong u ki la shah hiar thma ha ki katto katne ngut ki briew na katei ka shnong kiba la dawa ruh ïa ki ban khot ïa u Rangbah Shnong ka Maikhuli ban wan sha katei ka jaka.
La ïathuh ruh, ba hadien ba u Nicholas Marak lem bad u Ajitabh Barman uba dei u nongkitkam shnong ki la poi ha katei ka jaka ba la don ka jingshah ktah kti jong ki khun jong u, ha kum katei ka por la wan mih palat 50 ngut ki briew kiba na ka thaiñ Assam ban hiar thma ïa ki tad haduh ba ki la mynsaw malu mala bad ban pynlait im ïalade, kine ki nongïalam Shnong ka Maikhuli ki la phet krad noh na katei ka jaka.
Halor katei ka jingjia shah ktah kti bad shah thombor ha ki briew na Assam, na ka liang ki nongïalam shnong ka Maikhuli ki la ujor da ka ejehar ha thanad Basistha, Assam bad na ka liang ki pulit ki dang pynlong ïa ka jingtohkit halor kane ka jingjia.
Halor kane ka jingjia, u MLA ka Jirang Bah Sosthenes Sohtun u la bthah ïa ki pulit ka Ri-Bhoi ba kin leh eiei bad ban shimkhia ha ka ban ai jingïada ïa ki nongshong shnong nalor ban pynthikna ruh ïa ka shongsuk shong shngaiñ ha ka shnong Maikhuli.
