Naduh ba ka BJP ka la wan synshar, ka la don bha ka jingpyntieng ba kane ka seng kan pynbor ïa ki nongshong shnong ban bud tang ïa kawei ka jingngeit, ban kren tang ïa kawei ka ktien, bad kiwei-kiwei. Ka jingmut ka long ba ka BJP kan pynduh lut ïa ki jingïapher kiba kum ka Ri ngi sngewsarong ba ngi don. Ngi ïapher iwei na iwei pat, hynrei ha kajuh ka por, ngi ïashong ïasah lang ha kajuh ka Mei Ramew kaba ïar la da ki hajar snem mynta. Ka jingshah pyntieng ka long namar ka jingdon jong ka kynhun kaba ai ïa ka saiñpyrkhat ïa ka BJP bad kata ka dei ka RSS lane ka Rashtriya Swayamsevak Sangh. Wat u Myntri Rangbahduh ka Ri, u Narendra Modi, ha ki por kiba u dang don bad ka RSS, u la long uwei na kita ki ‘Pracharak’ lane ki nongïalap jong kane ka kynhun kaba don ïa ka shlem treikam ha Nagpur. Jan baroh ki nongïalam ka BJP ki dei kiba la ïoh jinghikai bad kiba bat ïa ka saiñpyrkhat jong ka RSS. Ki nongïalam ka BJP ki bym pat don jingïadei lane ïoh jinghikai na ka RSS kim ju kham ïoh lad ban paw hakhmat.
Kane ka jingïajan hapdeng ka RSS-BJP ka pynthud noh ïa kiwei pat kiba don da kawei ka rukom pyrkhat. Ngi sngewthuh ba ha kine ki snem, ka jingwanlam ïa ka niam ha ka saiñ hima sima ka la jur bha na ki daw bapher-bapher. Ban shu jop ilekshon khlem da pyndonkam ïa ka niam imat kam long shuh. Ka niam imat ka la kylla long kum ka mluh ha ki kam saiñpyrthei. Ym dei tang ka BJP kaba ïaid ha kane ka liang, hynrei jan baroh ki seng kin hap ban leh kumta ba kynthup hangne ha Meghalaya. Lehse kam pat paw than shabar hangne ha Jylla jong ngi, hynrei ngi tip mano kiba pyndonkam da ka niam ban khroh ïa ki nongthep ‘vote’. Namarkata, ym dei ban beiñ ne woh daw woh dong tang ïa ka BJP, hynrei hap ban peit salonsar.
Kum ki nongshong shnong ngi dei ban sngewthuh naei ka BJP ka wan bad naei ka shim ïa ka saiñpyrkhat jong ka khnang ba ngin ym lyngngoh ïa kata ka jingkwah jong ka ban pynlong beit tang kawei ha kane ka Ri baïar. Ngi la ïohi ïa ka jingskhem ka BJP ha ka nongrim da kaba weng syndon ïa ka Article 370 na ka Jylla Jammu & Kashmir ha u snem 2019. Kane ka dei ka jingkwah kaba la slem bah jong ka BJP. Hynrei ka la ap beit ïa ka por bad haba ka la sngewthuh ba ka la biang ha ka jingdon bun ki MP, ka la leit sha Parliament ryngkat ka aiñ rew kaba ong ban pyndam ïa ka Article 370 na Jammu & Kashmir. Ym tang katta, ka la pynhiar kyrdan syndon ïa ka Jammu & Kashmir na ka Jylla sha ka Union Territory. Ha ki snem kiba mynshwa, kiba bun ki la pynsngew ba ka BJP kan ym lah ban weng ïa kane ka kyndon kaba la mang beit thik tang ïa ka Jammu & Kashmir. Hynrei ha u Nailar 2019, ka BJP ka la leh ïa kaei kaba ka la thrang la slem. Lada ngi peit ruh ïa ka jingpynkylla ïa ka Citizenship Act. Ka BJP ka khlem salia ïa kiba pyrshah bad ka la ïaid beit shakhmat ban leh ïa kaba ka sngewdei ban leh. Hooid, ka la khot ïa ki kynhun ba pyrshah ban ïakren halor kane, hynrei ka khlem da sngap than haduh katta-katta.
Ngi ïohsngew ruh ïa ka jingud jingnam jong kiba bun halor ka jingpyndonkam palat ïa ka ktien Hindi ha man ki jingïalang ba khot da ka sorkar BJP namar ka eh ban sngewthuh khamtam kum ïa ngi kiba dei na kane ka thaiñ ha kaba ka Hindi kam dei satia ka ktien tynrai. Ïa kane ruh ngim dei ban lyngngoh. Kiwei ki lah ban ïa pyrshah la ka dei ha Northeast lane ha South India. Hynrei ka BJP ka ïaid beit shakhmat ban pyndonkam beit da ka ktien Hindi ha jan man ki kam. Ka jynjar shikatdei ïa ki bym sngewthuh ktien. Tangba mano ban sngap ïa ngi ki rit paid kiba don tang khyndiat eh ha kane ka Ri baïar.
Hapdeng kine kiei kiei, wat ka BJP ruh ka sngewthuh kham bha ba ha kane ka Ri kaba bun paid bad baïar, yn ym lah ban shu pynkylla lut sha tang kawei kane kawei katai. Ki jaitbynriew bapher-bapher ha kane ka Ri ki la wan tuid na kylleng bad ban pynlong shnong ïa ka. Hynrei ka BJP ka pyrkhat ban ïoh ïa ka ‘vote’ kaba bun na ki jylla kiba heh kum ka Uttar Pradesh, Madhya Pradesh, Rajasthan, Gujarat, Maharashtra, Bihar, West Bengal, Chhattisgarh, Karnataka. Kam da kheiñ than ïa ki Jylla ki barit kum ka Meghalaya bad kiwei namar ha ka saiñpyrthei, donkam ïa ki nombor ban ïoh synshar. Kine ki dei ki Jylla kiba lah ban ai bun ki nombor ïa ka BJP ha ka ilekshon. Ngi ha Meghalaya lei ngi don tang arngut ki MP Lok Sabha bad uwei ha Rajya Sabha. Ngim don dor eiei hakhmat ki Jylla kiba heh paid. Ngi shu kyrmen ba ka BJP kan ym pynbor than ïa kiei kiei ha ki nongshong shnong ki bym sngewïahap jingmut bad ka. Shisien ba la don ha ka synshar ka khadar, hap ban peit lut ïa baroh bad ym tang ïa kiba lah ban ai ‘vote’.
