Shillong, Lber 31
Hapdeng ka jingeh, ka jingduk bad ka jingjwat ha ka ban ai ka jingshakri sha ki khynnah skul, hynrei la lah ban sakhi ba ka Jingshai Barit SSA LP.School Pyrnai ka la kynjoh sha ka jingdap ba 25 snem ban ai ka jingshakri sha ki khynnah skul naduh ba la seng ïa ka da ki riew Rangbah jong ka Shnong Pyrnai.
Ka Jingshai Barit SSA LP School ka la rakhe ïa ka jingdap ba 25 snem ha ka jingïaid lynti jong ka, ha ka 31 Tarik u Lber 2026, ha phyllaw jong ka skul.
Ha kane ka sngi rakhe ïa ka jingdap 25 snem la ïadonlang naduh ki kmie ki kpa jong ki khynnah skul, Rangbah Shnong, ki nongïalam shnong, ki nonghikai, ki rangbah kiba la ïa don bynta lang ban seng nyngkong eh ïa kane ka skul, ka MDC ka thaiñ ka Kong Grace Mary Kharpuri, ki longkmie ki longkpa bad kiwei-kiwei de.
Hashuwa ban ïaid shakhmat ïa ka jingrakhe ka Kong Grace Mary Kharpuri ka la plie ïa u Mawnongrim jong ka jingdap 25 snem jong ka skul bad ha kajuh ka por ka la pynher ruh ïa ka Lama.
Ia kane ka skul la seng naduh u snem 2001 bad da ka jingtrei shitom bad ka jingbym kynrandien jong ki riew Rangbah jong ka Shnong kiba la seng, ka la ïaid beit haduh ban da dap mynta 25 snem kynthih.
Ban pynitynnad shuh-shuh ïa ka sngi rakhe, la ïoh ruh ka jingphawar na ki khynnah skul halor ka jingïaid lynti jong ka skul naduh ba la seng ïa ka, ka jingshad na ki khynnah skul, ki jingrwai na ki kaitor ba paw ka thaiñ nalor kiwei-kiwei de.
Kaba sngewtynnad eh ka long ba kane ka skul mynta ka la kiew kyrdan bad ïoh sa ïa ka Higher Secondary School ha u snem 2025.
Ha kane ka sngi ka skul ka la pynkupburom ruh sha ki nonghikai barim bad ki khynnah kiba pass nyngkong eh na kane ka skul bad la pynkupburom ruh ïa u Nongseng ïa ka skul u Bah Honroy Khongsit.
Ha kane ka sngi la batai lyngkot ruh ïa ka histori jong ka skul ha ka jingïaid lynti naduh ba la sdang ban seng ïa ka ha u snem 2001 da u Sir S.Khongsdir, Secretary SMC & Head Teachers L.P.
Ka Kong Grace Mary Kharpuri, MDC ka thaiñ haba kren ha kane ka sngi ka la ai ka jingkitbok kit rwiang ïa kane ka skul ba kan dangkiew shuh-shuh ha ki snem ban dangwan baroh. Da kaba Khmih lynti ba ka skul kan sa ïoh biang sa ka jingrakhe kiba kham heh kum ka ka jingdap ba 50 snem bad 100 shem ruh kumjuh.
“Ngi dei ban don ka jingïai shah, bad da ka jingïai shah ngi ïohi ruh ba ki nongseng ïa ka ‘Jingshai Barit SSA LP.School Pyrnai’ wat hapdeng ki jingeh hynrei u Blei u khlem iehnoh ban pynïaid shaphrang ban ai ka jingshakri sha ki khynnah skul,” ka la ong.
Shuh shuh ka la ong, ba ka pule ka puthi kan nym lah ban wanrah ïa ki jingkylla ha ka pyrthei hynrei ka pule ka puthi kan wanrah ka jingkylla ïa u ba ïoh ïa ka jingnang ka jingstad, ba un wanrah ïa ka jingkylla ha ka pyrthei hi baroh ka wei. Ka pule puthi ka dei kaba lah ban rad dyngkhong ïa ka jingduk.
La ïoh ruh ka jingkren na ki riew rangbah kiba la don bynta ha ka ban seng ïa kane ka skul.
