Nongpoh, Lber 31
Kum shi bynta ban kyntiew bad ai rynsan ïa ki khun samla jong ka thaiñ ha ki liang ki bapher-bapher, ka Hid Foundation ha ryngkat ka jingïatreilang bad ka Seng Samla Shnong Mawlong (SSSM) Ri Bhoi District ha ka 28 tarik mynta u bnai, kala lah ban pynlong ïa ka tamasa Ri Tyngkai 2026 kaba jop bad shongkun bad kaba khring ïa ki paidbah nongshong shnong jong ka thaiñ Nongtluh.
Ïa kane ka tamasa kaba la pynlong ha madan ïalehkai jong ka shnong Mawlong Nongtluh, la wan ban plie paidbah da ka Kong JS D Maiong, dkhot jong ka State Commission for Protection of Child Rights kaba dei ruh ha kajuh ka por ka CEO jong ka Hid Foundation katba ïa ka prokram pynhap pyrda ha ka janmiet pat la wan ban ïashim bynta da ka Kong Rona Khymdeit, MDC ka Nongpoh kum ka kongsan.
Ha kane ka sngi, la sakhi ruh ïa ka jingïadon ryngkat jong u Bah Plielad Tiewsoh, Chairman jong ka Ri Bhoi Tourism Development Forum, ki Rangbah Shnong na ki shnong bapher-bapher, ki longkmie bad ki samla kynthei bad shynrang na ka thaiñ Nongtluh hi baroh kawei.
Lyngba kane ka tamasa, la sakhi ïa ka jingwan shim bynta jong palat 20 tylli ki kynhun bad ki ‘riew shimet ha ka jingïakop pyn-i ïa ki sap bapher-bapher ba kynthup naduh ka jingïakop rwai, jingïakop shad bad kiwei-kiwei. Ki nongwan peit kai ha kane ka tamasa ki la ïoh ruh ban mad ïa ki jingbam tynrai kiba shngiam kiba la shet ha ki tyndong siej, nalor ka jingdie ïa ki tiar shna kti bad ki jaiñ Ryndia ba pawnam kiba la thaiñ bad pynmih hi da ki nongshong shnong jong ka thaiñ Nongtluh.
Ha ka jingïakop pyn-i ïa ki sap bapher-bapher, u samla Wanborlang Mawphniang u la ïoh ban rah ïa ka nam ba nyngkong, ka samla Teideplut Marsing ha ka kyrdan kaba ar bad ka samla Ribamon Rynshon ha ka kyrdan kaba lai. Katba saw tylli ki khusnam consolation pat la ïoh da u samla Mayos Madur, ka Ilapynsuk Kharkongor, ka Government LP School, Mawlong bad ka samla Katepery Matong.
Shuh shuh, ha kane ka janmiet la ïoh ruh ban pynlong ïa ka jingïatai halor ki jingdonkam jong ka imlang ka sahlang bad ruh kumno ban kyntiew bad aibor ïa ki khun samla katkum ka phang pdeng kaba la ai kyrteng ‘Social Needs and Youth Empowerment’ ha ka ktien phareng.
Halor ka jinglah ban pynlong ïa kane ka tamasa kaba jop bad kaba ïaid beit ïaid ryntih, na ka liang ka Hid Foundation kala pynpaw ïa ka jingai khublei kaba kyrpang sha baroh kiba la ïadon bynta ban shimkhia bad pynlong ïa kane ka tamasa kaba jop bad kaba shongkun.
