Shillong, Lber 31
Ki MDC ka Liang Pyrshah ha Khasi Hills Autonomous District Counci (KHADC) kila pdiang ïa ka rai jong ka Executive Committee (EC) ban thung ïa ka Special Committee ka ban khmih ïa ka jingtyrwa pynkylla ïa ka AD Rules.
Haba kren sha ki lad pathai khubor, u Bah Titosstarwell Chyne uba dei u Nongïalam ka Liang Pyrshah ha KHADC u la pynpaw ïa ka jingkyrmen ba kane ka sienjam kan pynïaid sted ïa ki kam.
Hadien ka jingïakynduh bad u Chief Exe-cutive Member (CEM) Bah Winston Tony Lyngdoh ha ka sngi Ba-ar, u Bah Titos u la ïathuh ba u CEM u la ai ka jingkular ba kane ka Special Committee kan kynthup ïa ki dkhot na ka Liang Pyrshah, ki ophisar bad ki Executive Member.
Ïa kane ka Committee la khmih lynti ban thung ha ka taiew ban wan bad kan ïakren halor ka jingpynkylla ïa ka Rule 128 bad kiwei ki bynta ba kongsan jong ka AD Rules.
“Kin sa thung ïa kane ka Special Committee hapoh ka taiew ban wan bad kane ka Committee kan shong bad ïasyllok bniah halor ka jingpynkylla ïa ka AD Rules ba ïadei bad ka Rule 128 bad kiwei ki bynta ba kongsan kiba donkam ban hap pynkylla kham kloi kat kaba lah,” ong u Bah Titos.
U Bah Titos u la pynpaw ïa ka jingkyrmen ba ka jingthung kloi ïa ka Special Committee kan lam sha ka jinglah pynkylla hapoh ka por ba dei ïa ka AD Rules, kumba la khmih lynti da ki paidbah.
