Jowai, Lber 31
Palat san spah ngut ki nongshong Shnong jong ka Shnong Huroi bad Lahalein ki la mih madan ha ka jingïaid paidbah ha Nongbah Jowai ha ka 31 tarik Lber ban pyrshah ïa ka jingai sanad bad ithuh shnong thymmai ïa ka Shnong Umpyrshin kaba long ka kyntoit jong ka Shnong Huroi da ka Jaiñtia Hills Autonomous District Council (JHADC).
Ka shnong Huroi bad ka Shnong Lahalein ki dei ki shnong kiba don ha khappud Indo-Bangladesh. Kine ki ar shnong ki la wan ha nongbah Jowai kaba palat 100 KM da ki kali pickup ryngkat ka jingteh lama ïong.
Ka JHADC ka la ai sanad ïa u Johny Suchen kum u waheh shnong ka Umpyrshin hapoh Elaka Rymbai, East Jaiñtia Hills District ha u Kyllalyngkot 2026.
Ki ar shnong kila kam ba ka Umpyrshin ka dei tang ka kyntoit ne dong kaba dang hap hapoh ka shnong Huroi, East Jaiñtia Hills District, hynrei ka JHADC kala ai sanad bad ithuh shnong thymmai ïa ka Umpyrshin khlem ka jingmynjur jong ki ar shnong bad ka Elaka Rymbai.
Ka jingïaid paidbah ka sdang na Mynthong Jowai shaduh ophis JHADC kaba la shim bynta da ki spah ngut ki nongshong shnong naduh ki longkmie longkpa haduh ki samla shynrang bad kynthei ryngkat ka jingpyrta pynrem ïa u CEM, Chairman JHADC uba long ruh u MDC ka thaiñ bad ka NPP, UDP kaba ïalam ïa ka EC ha JHADC.
Hashwa ba ki nongshong shnong jong ki ar shnong kin poi ha phyllaw jong ka JHADC, ïa ka khyrdop la khang tala bad la sakhi ruh ïa ki pulit kiba la pahara ïa ka ophis ka council da kaba pynkhreh ruh ïa ki lyer pynsat khmat ïoh ba mih ka huri hura.
Haba ki paidbah jong ki ar shnong kila poi hakhmat khyrdop ka JHADC, u magistrate Ma GH Passah u la ailad tang 10 ngut ki nongïalam shnong ban rung shapoh ka phyllaw ka council ban ïakren bad ka Secretary ka Kong B. Bamon ryngkat ki ophisar jong ka JHADC katba kiba bun kila ap hakhmat khyrdop JHADC.
Hadien katto katne la wan poi artylli ki kali jong ki MDC ka JHADC bad ki pulit kila pyllait ïa ki ban rung sha ka phyllaw jong ka ophis JHADC, hynrei ki paidbah kiba la ïohi ïa kane kila phawer da ka sur ba ong, ‘Tang poi kali remdor, O ka gate te kala plie, ïa ngi u rit u ria, la shu shong ha surok’.
Hadien ka jingïakren bad ka Secretary, u Ma Raja Suchen, waheh shnong Huroi u la pyntip sha ki paidbah ba na ka liang ka council kala pan por na ki ar shnong namar ha ka 6 tarik Ïaïong ka JHADC kan pynlong ïa ka EC na ka bynta ban thaw ïa ka Tribunal ban bishar ïa ka kam jong Huroi bad Umpyrshin.
Katba na ka liang ki ar shnong kila dawa na ka council ba dei ban pyndep ïa kane ka kam hapoh ka por ba la buh bad lada jia don kano kano ka jingjia ha kitei ki shnong, ka council kan bahkhlieh.
Shwa kane u Waheh shnong ka Lahalein u Ma Mit Dkhar u la kynnoh ba ka jingïahuri hura ka mih na ka daw ka jingwan jong ka surok High Speed Corridor lyngba kitei ki shnong.
