Shillong, Lber 31
Ki kynhun kiba don hapoh ka shatri jong ka Synjuk ki Trai bad Nongñiah kali kamai ka bri u Hynñiewtrep ki la dawa na ka Sorkar bad na ka tnad pulit ba dei ban kem mardor ïa u briew uba shoh bad byrngem sei suloi ïa u nongñiah sumo.
Kane ka jingdawa ka dei ha ka jingïalang ba la pynlong ha phyllaw ka State Central Library Shillong ha ka sngi Ba-ar na ka bynta ban pyrshah bad ban pynrem jur ïa u briew u ba thap bad byrngem sei suloi ïa u nongñiah kali sumo kaba la jia ha ka 27 tarik Lber 2026 .
Ha kajuh ka por ki nongïalam nongñiah kali kamai ki la leit ban buh da ka jingthoh sha u Superintendent of Police ka East Khasi Hill ban dawa ba dei ban kem mardor ïa uto u briew uba shoh ïa u nongñiah sumo uba byrngem ban sei da ka suloi.
U Bah Balajied Jyrwa uba dei u nongïalam ka Synjuk u la ong ba ka Synjuk ka dawa na ki bor pulit ba ki dei ban knieh noh ïa ka laisen pistol bad lada ym don ka laisen, ka aiñ ka dei ban pynshitom katkum ka kyndon pyrshah ïa utei u briew.
U la ong ba ka jingïa map ka shong ha u trai ba shah shoh la u map ne em hynrei utei u briew uba shoh ïa u nongñiah kali kamai sumo u dei ban wan panmap hapoh ki lad pathai khubor bad hakhmat paidbah ki nongkamai kali baroh.
U la kyntu ïa ki bor ka aiñ ba ka dei ban shimkhia halor kane ka mat jingdawa bad lada ki bor ba halor kim shimkhia ïa ki mat jingdawa, ka Synjuk kan shim kiwei ki sienjam.
Na ka liang u Bah Ricaldinus Dohling, President ka All Khasi Meghalaya Tourist Taxi Association u la ong ba lada ki pulit ki don shisha ka jingkwah ban ïarap na ka bynta ki paradoh para snam shibit ne lashai dei ban ïohsngew ba la kem ïa une u briew lym kumta ki nongñiah kali kamai ruh ki don la ka bor ka iktiar ban leh ïa kaba donkam.
Ha kane ka sngi la ïamih ryntih da ki nongïalam ki nongñiah arshaka ki nongïalam nongñiah taksi ki trai bad nongñiah trok bad kiwei kiwei.
