Shillong, Lber 31
Ka Meghalaya Swimming Associa-tion (MSA) ka la pynkup burom ïa ki nongjngi ka Jylla kynthup ïa ka Verem Gedaliah Nongsiej kaba la khur ia ka takma rnong ha ka 1st Khelo India Tribal Games 2026 kaba la long ha Chhattisgarh lem bad ka Pdiangsuklang Syngwan kaba la khur ïa ka takma rnong ha ka Eastern Zone jong ka (ASMITA) Women Swimming League kaba la long ha Guwahati.
Kane ka jinglah ban khur takma ha ki lympung ïalehkai shabar jylla ka long hadien ki 23 snem naduh ba la seng ïa katei ka synjuk.
Ïa kane ka jingpynkup burom la pynlong ha ka jingïalang kaba la long ha ka sngi Ba-ar ha pung Crinoline ha kaba la ïadon lang u President Bah Ian Lyngdoh, kumjuh u General Secretary Bah Baika Lyngdoh nalor kiwei pat ki dkhot jong kane ka synjuk, ki kmie ki kpa lem bad ki khynnah.
Napdeng ki phra ngut kiba ka MCA ka la phah sha Chhattisgarh, ka Verem ka la long tang marwei ban khur ïa katei ka takma ha ka 50 meters freestyle Open Category ha kaba ka la wan ha ka kyrdan balai.
Kiwei pat ki nongjngi kiba la shah pynkup buom lang watla kim shym la lah ban kynjoh sha ka thong ki long ka Nazareen Parïong, Em-i-rta Ksoo. Meïaipynsan L. Tron, Mebankitboklang Banai, Jenifer Rymbai, Banpynshgain Syngwan bad Elberz Winston Kharbani.
Kane ka synjuk ka la pynkup burom ruh ïa ki nongjngi kiba la shim bynta ha ka ASMITA Women Swimming League ha kaba ka Pdiangsuklang kaba na Shella ka la khur ïa ka takma rnong ha ka 50 meters freestyle Open Category.
Kiwei pat ki bym shym la shim bynta lang ha katei ka lympung ki long ka Pdiangsuklang Syngwan, Gail Darlene Syiem, Sumarbiang Mawlong, Ilarisuk Youroi, Tvsha Jalewa bad Eugenea Sumer.
Na ka liang ki nongïalam ka MSA ka pynpaw ïa ka jingkmen halor ka jinglah ban pynpaw ïa ka jingtbit da ki nongïalehkai wat hapdeng ka jingbym biang ka pung jngi, ki coach bad kiwei kiwei ki jingdonkam.
Ïa kane ka kynhun jong ki nongjngi la ai jinghikai da u High Performance Coach u Laitonjam Santosh nalor kiwei pat.
