Shillong, Lber 31
Ka Shillong Lajong FC kan pynkhreh ïa ka jingïalehkai shabar na la ïing ha ka lympung ïalehkai Indian Football League pyrshah ïa ka Sreenidi Deccan ha ka sngi Balang ha ACA-VDCA Cricket Stadium kaba ha Visakhapatnam, Andhra Pradesh.
Kumba ka paw ha ki ar tylli ki jingïalehkai shabar na la ïing, ka Lajong ka la lah ban khur baroh ar tylli ki jingjop hadien ba ka la pynliem ïa ka Chanmari FC da 2-1 kol ha Aizawl bad ka Gokulam Kerala da 2-0 kol ha Kozhikode, Kerala.
Hadien ki san sien ïakhun ka Lajong hapoh ka jingïalam u Virendra Thapa ka la kamai mar 10 poiñ bad ka Sreenidi, kaba la ïoh ban lamkhmat hadien ba ka la tam lyngba ka jingïapher ha ka jingthep kol. Te kumta ka Lajong ka la don ha ka kyrdan balai bad ïa ka kyrdan ba-ar la bat da ka Diamond Harbour. Lah ban kdew ha ka jingïalehkai ba la lah, ka Sreenidi ka la jop da 3-1 kol ïa ka Dempo.
Te kumta la khmih lynti ba kane ka jingïalehkai kan long kaba itynnad namar baroh ar ki kynhun ki donkam ban khur ïa ki lai poiñ na ka bynta ban bat ïa ka kyrdan ba hakhlieh.
