Shillong, Lber 31
Ka Confederation of Meghalaya Social Organization (CoMSO) kaba la shong ïa ka Executive Committee ha ka sngi Ba-ar ha Shillong ka la shim ïa ki ar tylli ki mat kiba kongsan na bynta ban ïada ïa ki trai ri trai muluk kiba sah ha Meghalaya.
Haba ïakren bad u Bah Roykupar Synrem uba dei u Chairman ka CoMSO bad President ka HYC u la ïathuh ba kine ki ar tylli ki mat ba ka kynhun ka la shim rai ka long ban dawa noh ban pyntreikam ïa ka Special Intensive Revision (SIR) bad ka jingpynkylla ïa ka Schedule Tribe Order jong u snem 1950.
U la ïathuh ba ka kynhun ka la thoh sha ki bor Sorkar India bad sha ka Sorkar Jylla namar ka kwah ba kine ki mat ki dei ban urlong noh kham kloi hadien ba la ïohi ïa ki jingjia ha kine ki bnai kiba la dep hapoh ka jylla.
U la ong ba ka Election Commission of India ka dei ban pyntreikam noh kloi ïa ka Special Intensive Revision bad peit bniah ba kiba rung kyrteng ha ka Electoral Roll ban pynthikna la ki dei ne em ki nong India.
U la ong kiba rung ha ka thup thep vote ki dei ban long ki trai shnong naduh u 1971 bad ïa kiba wan hadien yn ym shah shuh ïa ki.
Shuh shuh u la ong ba ka jingdawa ban pyntreikam ïa ka SIR ka long ban wanrah ïa ka ilekshon kaba khuid namar ki la ïoh jingtip ba ki briew kiba sah ha khappud Meghalaya bad Assam u juh u briew ki thep vote baroh ar tylli ki jylla.
U la pyntip ba ka kynhun ka kwah ban pynbeit thymmai noh ïa ka thup Schedule Tribe (order) 1950 namar hapoh ka jylla ki don palat 50 tylli ki jaidbynriew kiba la ithuh kum ki Schedule Tribe kaba la ithuh ïa ki naduh por ba dang hap ha jylla Assam kaba ki ïoh lang ïa kajuh ka hok.
U la pynkynmaw ba u Myntri ka tnad Social Welfare ka Sorkar Jylla u la pyntip ba la dep thaw ïa ka Committee ban peit bniah ïa ka ST 1950 naduh u Nohprah 2024 hynrei haduh mynta kane ka committee kam pat pan jingmut na ki riew pawkhmat.
U Bah Roykupar u la pyntip ba ka KHADC ruh ka la dep mynjur ha ïingdorbar ban phah sha ka Sorkar Jylla ban pynbeit thymmai ïa ka ST 1950 namar ka wanrah jingduhnong ïa ki trai jylla.
Kumta ka CoMSO kan sa pan jingmut na ki Synjuk Rangbah Shnong, Waheh Shnong bad Nokma halor ka ST 1950.
Ha kajuh ka por lada ka Sorkar kam sngap ïa kane ka jingdawa kan sa leit sha u paidbah.
