“Sa shisien, sa shisien, kin win ki khlaw; sa shisien, sa shisien, kin khih ki maw”. Kine ki kyntien jong u Myllung bakhraw ka jaitbynriew, u Soso Tham, ki ïahap dur ïahap dar ha kano-kano ka por kaba ngi sngewduh jingkyrmen lane haba ka jingdum ka ker sawdong lane haba don ka jingsngew kut lad kum ka jaitbynriew. Ngi la ïohi ha kine ki sngi ba ka jingduh jingkyrmen ha ki nongïalam ba don ha ka sorkar jylla ka jur bha. Ki paidbah na kylleng sawdong ki pynpaw ïa kane ka jingsngewduh jingkyrmen. Mano bym don jingkyrmen haba kat shaba phai tang ki jingeh bad ka shitom ka shipa suda? Ngim ïakren hangne ïa ka shimet, hynrei kyllum kum ka jaitbynriew bad ka jylla.
Ki samla, kiba dei ka lawei bad ka lashai ka jong ngi, ki khuslai jingmut bad ki lynga mynsiem na ka daw jong ka jinghiar ha ka pule ka puthi, ka jingbym don ki lad ai kam ai jam, bad ka jingnoh shiliang ka pyrla ha ka jingbhah ïa ki kam ki jam. Ki kmie ki kpa ki sngew kut lad haba ki ïohi ba wat lada ki la pynnang pynstad ïa la ki khun, ka lawei ka long kaba dum namar ka jingbym don ki kam ki jam. Ki nonghikai ha ki skul ki hap ban mih surok lane ban kyang lyngba ki lad pathai khubor ban dawa na ka sorkar ban pyllait ïa ka tulop jong ki. Ki nongbylla ki ud ki nam namar ka jingïoh bylla ka neh kumjuh katba ka dor ka mur ka la nang kiew kat nang mih ki sngi. Kine ki dei tang ki nuksa kiba paw shabar. Ki don bun kiwei pat, kiba don ha ka khuslai, ka lynga namar ki daw bapher-bapher kiba mih na ka jingbym biang ka synshar ka khadar.
Ngin hap ban pynkynmaw ba ka synshar ka khadar ka bishar kaba jaboh lane ka bym shai lane kaba bun ka ahor, ka pynsyrtok ïa ki raïot. Ngim kam hangne ba ki don ki bakhuid basuba bad kiba lieh kum ka ïor haduh ba kim don shuh kano-kano ka jingduna. Kat dang dei hi ki briew, ki jingduna, jingbakla kin ïai don tad haduh ka sngi khatduh ha kane ka sla pyrthei. Hynrei ngi hap pat ban pyndonkam da ka pyrla ban ïa thew ïa woh kino kiba kham biang bad ïa kino dei ban kyntait. Lada bakla ha ka ïa thew ïa woh, la bakla nadong shadong bad ngin kut ha ka jingbabe. Ban mad ïa kijuh ki jingeh ha ka san snem, kam dei ka kam kai. Lada la khynñiat ïa ki briew sha kynroh jong ka jingkutlad, ka jingma ka don. Lada ka jngïapher hapdeng u baduk bad u bariewspah ka ïar shaba palat ha kaba uba duk u nang syrtok bad u riewspah u nang kmen toh hoh, ka jingma ka don. Lada kiba ïoh kam ïoh jam lane kiba ïoh jingmyntoi ki dei tang katto katne katba kiba bun ki hap ban shu peitkai, ka jingma ka don.
Ka ju long ka rukom hangno-hangno ruh ba kiba ïajan bad kiba don ha ka bor ki ïoh lut watla ki khlem pan eiei. Katno ngut pat ki don kiba kum kita? Na ka 100 lehse kin don arngut. Tangba ka synshar ka khadar ka bishar ka dei ban long ïa baroh salonsar ne tang ïa kiba don jingïadei bad kiba bat ïa u lakam jong ka jingsynshar? Kaba kum kata ka jingsynshar ka dei ban duh jait. Kumno kan wanrah jingbha lada ïoh jingmyntoi tang ki bahaïing lane para marjan lane paralok jong kiba don ha ka bor katba kiba bun ki shah kyntait sharud bad kim don jaka ban phai shano-shano? Kumno ki jingmyntoi kin leit tang sha kita ki 1 per cent (1 na ka 100) bad na kita ki jingmyntoi ki lah ban korbar lut kat ïa kaba don khlem da pyrkhat ïa ka jingmyntoi lang jong kiba bun? Ka jingduk jingkyrduh kam dei ban don hangno-hangno lada ka jingsam ïa ki jingdon jingem ba ai ka Mei mariang ka long ha ka rukom kaba shai, ba khuid bad ka bym shah liang. Hynrei kam long kumta. Kiba ïoh ki nang ïoh kyrhai, kiba duh ki shah knieh noh ïa kaei kaba ki don ruh.
Hapdeng kine kiei-kiei, mynta pat ngin hap ban pyndap halade da ka mynsiem jong ka jingkyrmen. Wat pynjem daw pynjem rngiew ïalade bad ïa kiwei da kaba thew ïa ka pyrla na ka pla ki heh spah bad ki khwan myntoi. Kan long ka jingjem daw ka bakhraw lada ngi shah pynlong mraw ha ka spah jong kiwei. Ngim tip lada kata ka spah ka dei kaba la da kamai da ka hok ne kaba shu klun nangno-nangno. Tangba ngi sngewthuh shai ba lada ka dei ka spah kaba la ïohlum da ka lynti jong ka hok, yn ym don ban shu wan theh kai. Ka dei beit ka spah bym hok. Bad shisien ba la shah teh kynjri ha ka spah bym hok, ki jingeh kin wan ban tyllep ym tang shimet, hynrei ïa ka jaitbynriew bad ka jylla. Lada ngim lah ban pyneh rngiew ïalade ha kane ka por, ki jingeh kiba kham shyrkhei kin sa wan tyllep ïa ngi. Pyneh la ka rngiew ban ksaw ka bok, bad ailad ba sa shisien, kin win ki khlaw, bad sa shisien kin khih ki maw.
