Shillong, Lber 31
Ka tnad jngohkai pyrthei ka Sorkar Meghalaya ka la pynpaw ba ki khubor kiba mih ha ki rynsan lad pathai kiba kam ba ka jingtyrwa ban tei ïa ka Taj Umïam Resort & Spa kan ktah ïa ka pung Umïam bad ka dewlynnong Lumpondeng ki long kiba “bym don nongrim” bad “kiba ïalam bakla.”
“Ki jingsngewkhia kiba pynpaw ba kane ka projek ka long ka bym lah ban pynneh-pynsah ïa ka mariang ne kan ktah jur ïa ka jinglong-jingman ka pung Umïam bad khamtam eh ka dewlynnong Lumpondeng ki long ki jingpyntip ba pynsngewthuh bakla bad ba ïalam bakla,” ong ka kyrwoh na u Commis-sioner & Secretary ka tnad jngohkai pyrthei ha ka Sngi Ba-ar.
Ka la ong ba ka projek ka kynthup ïa 66 akar – 36.10 akar jong ka dew lynnong Lumpondeng bad 29.64 akar jong ka Orchid Lake Resort kaba la don lypa – bad ka bud “ïa ka rukom saiñdur kaba la pyrkhat bha kyrpang – kaba thmu ban kyntiew ïa ka kam jngohkai pyrthei kaba heh dor, kaba duna ka jingktah ha ryngkat ka jingpyntikna ïa ka jingïada kaba pura ïa ka mariang.”
Ka Umïam Hotels Pvt. Ltd., ka SPV ba la mynjur, ka la ïoh ïa ka ‘Consent to Establish’ bad ïa soi ïa ka MoU bad ka IHCL ban pynïaid ïa katei ka jaka kum ka Taj Umïam Resort & Spa.
Ka tnad ka la kdew ïa ka saiñdur pynneh-pynsah jong ka IHCL, kynthup ïa ka jingïashim bynta ha ka ‘Earth Check Certified Program’ naduh u snem 2008 bad ka Taj Madikeri Resort & Spa, kaba la tei ha ka jaka khlaw kaba heh 180 akar bad kaba la pyndonkam tang khyndiat eh ïa ka jaka.
“Baroh ki kam shna jingshna bad jingpyntreikam yn bud katkum ki kyndon jong ka IHCL Taj Brand, kiba bthah ban bud ryntih ïa ki kyndon ba ïadei bad ka jingpynwandur, jingshngaiñ, ka jingbha bad ka jingneh,” la ong ka kyrwoh.
Ka la bynrap ba kane ka projek kan bud ryntih ïa ki kyndon jong ka Forest (Conservation) Amendment Act, 2023, Waterbodies Guidelines, 2023, bad ka Meghalaya State Pollution Control Board, da kaba buh hakhmat eh ïa ka jingpynneh-pynsah ïa ki jingthaw ba don jingim, ban tehlakam ïa ka jingjaboh, ban pynduna ïa ki jaboh-jabaiñ, bad ka jingpeitngor ïa ka mariang.
“Yn buh hakhmat eh ïa ka basa-jingim jong ka thaiñ, kynthup ïa kino-kino ki jingktah kiba lah ban mih pyrshah ïa ki sim ki doh bad ki doh-um doh-wah lyngba ki lad ki lynti kiba pyrkhing na ka bynta ban pynneh-pynsah ïa ki jingthaw ba im, ban tehlakam ïa ka jingjaboh, ban pynduna ïa ki jaboh-jabaiñ, bad ka jingpeitngor ïa ka mariang, da kaba pyntikna ba ka roi ka par kan ïai long kaba kitkhlieh ïa ka mariang bad kaba bud ryntih ïa ka aiñ,” la pynkut ka kyrwoh.
