Shillong, Lber 31
Ka nongïalam ka NPP bad MLA ka East Shillong, ka Dr. M. Ampareen Lyngdoh, ka la kyntait ïa ki khubor kyntiap seng jong ki MLA, da kaba ong ba ka dei ka “jinglong-jingman kaba ju jia jong ka synshar paidbah ha India”.
Haba kren sha ki lad pathai khubor ha ka Sngi Ba-ar, ka Dr. Lyngdoh ka la ong, “Ka long ka jinglong kaba phylla kaba ngi don mynta. Ha kawei ka liang, phi ïohsngew ïa ka jingkwah jong ki MLA ban ïasoh bad ka kynhun jong ka NPP – phi ïohsngew ïa ki khubor hamsaïa ha kaba ki MLA kiba ha ka liang synshar mynta ki pyrkhat ban kyntiap seng sha ka NPP, hynrei ha kawei pat ka liang, phi ïohsngew ruh ïa ki khubor hamsaïa ba ki MLA kin mih noh.”
Ka Dr. Lyngdoh ka la ban jur ba ka jingkyntiap seng kam dei ka rai kaba suk ïa uno-uno ne kano-kano ka MLA.
“Ngan ïathuh ïa phi kawei. Kane ka dei ka jinglong kaba ju jia ha ka synshar paidbah ha India. Ka long kaba eh bha ïa ki paidbah ban sngewthuh ba kam dei ka jingtyrwa kaba suk ïa u kyrtong ne u MLA ba don hapdeng ka jingshakri ban shu rai kynsan-kynsan ban kylla liang sha kawei pat ka saiñ pyrthei. Ka long kaba ju jia ha ka ri India,” ka la ong.
