Shillong, Lber 31
Ka lympung ïalehkai P.A.Sangma Memorial T20 Cricket Tournament 2026 ba la pynïaid da ka Shillong Cricket Association (SCA) ka la jam sha ka Super 8 bad la phiah ïa ki ha ki ar tylli ki group.
Ki kynhun kiba la rung sha kane ka kyrdan ki long ka Sputnik CC, Langsning, Lok Bhavan bad ka Young Guns kiba don ha ka Group-A, katba ha ka Group-B ki long ka Rhinoland Cricket Academy, Rangkynsai, Capital Stars bad ka Royal CC.
Te kumta ka jingïalehkai jong kane ka Super 8 kan sdang naduh ka sngi Balang ha kaba ka Lok Bhavan kan ïakhun pyrshah ïa ka Young Guns ha ka por 8:30 mynstep, katba ka Rhino Cricket Academy pyrshah ïa ka Royal ha ka por 12:30 mynsngi.
Ki kynhun ki ban khur jingjop ha kane ka Super 8 kin ïoh rung sha ka semi final ka ban long ha ka 11 tarik bad ka final la buh ban long ha ka 13 tarik mynta u bnai.
