Naduh nyngkong u Blei nongthaw nongpynlong ula thaw ïa u briew kynthei bad shynrang. Bun ki jaitbynriew ki ngeit ïa kane. Ngi ki Khasi ngi shim jait na ka Im kaba long ka kynthei. Ka Im ka dei kaba u Blei u la thaw na ka shyieng krung u Adam (Shynrang). Kata katkum ka jingngeit ka niam Khristan. La ong ba u Blei ula buh ha kata ka kper Eden.
Hynrei u Blei u la mana tang ïa uwei u jait soh bad uta u soh uba kyrteng u Soh Adong. Une u soh u bym bit ban bam ïa u. Hynrei ka Im ka long ka briew ka bym kohnguh ïa u Blei ruh. Ka la bam ïa uta u soh adong bad ym tang ka bam ïalade, hynrei ka la ai bad phah bam ha u Adam u tnga jong ka ïa uta u soh adong ba u Blei u la mana ban bam napdeng ki jait soh baroh. Hangne ngi dei ban sngewthuh ba ka Im ka long ka briew kaba sniew. Kumta u Blei naduh nyngkong um treh ban ai jait sha ka kynthei (Im). Hynrei u Blei u la ai jait ha u shynrang ba un long u nongbat symbai ban pynroi ïa ki briew ha pyrthei.Kumta ki briew jan baroh ha satlak ka pyrthei ki ai jait ha u shynrang lait noh tang katto katne kum ka jaitbynriew Khasi ka kwah ban shim ïa ka jait na ka Im kaba long ka kynthei briew. Kane ka dustur u Khasi shisha ka ïalam bakla bad ka pynduh noh ïa ka tynrai u symbai, namar kim ñiewkor bad kim burom ïa ka jingai u Blei kum u nongthaw nongpynlong ïa kiei kiei baroh lyngba u Symbai u sohpet u ksai ka longdoh longsnam ka longkur longjait kaba la kyrkhu u Blei.
Kane la ïuhroit bad pynduh pyndam ïa u symbai ka hok longtrai u rangbah Khasi uba dei nongai symbai bad uba pynroi ïa ka kur ka jait nylla khlem da pynthohbria kumba long mynta. Ka jaitbynriew Khasi kam dei shuh ka jaitbynriew kaba kyrpang ka dei ka jaitbynriew kaba plie rynhang kaba im bad leh katba mon ym don shuh ka tynrai kumba u Blei u la ai ha ngi u Khasi naduh hyndai hynthai ïa ka hok longbriew manbriew.
C. B. Iawphniaw
