Leh, Lber:
Ki la don katto katne ngut ki briew ha Leh kiba la mih shakhmat ban noh synñiang da ka pisa, ki mar ba kordor, ki jingdeng bad kiwei kiwei ki tiar kiba kordor ban ïarap ïa ki nongshong shnong ha Iran kiba don mynta hapdeng ka jingeh na ka daw ka jingïakynad ha West Asia. Kawei ka khynnah ruh ka la pynpait ïa u khra pyllang pisa jong ka ban noh synñiang sha ki jingïarap ha kum kane ka por.
Ki nongshong shnong ha Ladakh ki dang pynlong ïa ki jingnohsynñiang bad ka jingïarap ïa ki nongshong shnong ha Iran kiba la shah ktah na ka jingshah thombor jong ka US bad ka Israel ha kine ki 30 sngi ba la dep jong ka jingïakynad.
La lah ruh ban ïohi katto katne ki bicycle jong ki khynnah napdeng ki tiar ba la ai sngewbha, kaba phah ïa ka khubor kaba khlaiñ jong ka jingsngewlem bad kyrshan ïa ka Iran.
Ha ka taïew ba ladep, da ki spah ngut ki briew na ka jaitbynriew Shia, ki la ïalumlang ha Imambara ha Chanderkot jong ka Jammu & Kashmir, na ka bynta ban ai jingïarap da ka pisa bad ki tiar ki tar, sha kito kiba shah ktah ha ka jingïakynad kaba dang ïai bteng ha Iran.
Ka jingai jingïarap paidbah ka la ïohi ïa ki nongshong shnong ba ki la noh synñiang ïa kiei kiei baroh naduh ki tiar ïing haduh ki jingdeng kordor ban kyrshan ïa ki paidbah kiba don ha ka jingeh ha shiliang khappud.
Ki Shia jong ka thaiñ Chanderkot ha Ramban distrik ki la ai jingïarap da ki jait jingïarap bapher bapher na ka bynta ki briew ki baduk jong ka Iran kaba la shah ktah ha ka thma.
Ki briew na ka jaitbynriew Shia ki la noh synñiang da ka pisa, ki tiar, ka ksiar bad ka rupa, bad ki khynnah ki la ai sngewbha da ki pisa ba ki la pyllang jong ki. Ki kynthei ki la ai sngewbha ïa ki jingdeng ksiar bad rupa jong ki.
Ki la loit wat ïa ki khadu bad ki sohshkor na ki khun jong ki bad ki la ai sngewbha ïa ki na ka bynta ki briew jong ka Iran kaba la shah pynjot ha ka thma. Uwei u briew ruh u la ai sngewbha ïa ki langbrot jong u.
Nalor kata, ki nongshong shnong ha Budgam ki la noh synïiang ruh da ka ksiar, ka rupa, bad ka pisa ban kyrshan ïa ka Iran hadien ka jingeh ha ka thaiñ West Asia.
Haba kdew ïa kine ki jingpyrshang, ka tnat treikam jong ka Iran ha India ha ka 22 tarik u Lber ka la ai khublei ïa ka jingsbun bad ki jingsngew para briew jong ki nong India kiba la noh synñiang da ka pisa bad ki jingdeng ban tei pat ïa ka Iran. Ka Embassy ka la ong ba kin kynmaw junom ïa ka jingbha jong ka India.
“Ngin ym klet ïa ka jingsbun bad jingsngew para briew jong phi. Khublei shibun, India,” la ong ka embassy.
“Da ki dohnud kiba dap da ka jingsngewnguh, ngi ai khublei shisha ïa ki briew kiba sbun jong ka Kashmir kiba la ïeng ryngkat bad ki paidbah jong ka Iran lyngba ka jingkyrshan ba sbun jong ki bad ka jingïatylli kaba naduh ka dohnud; ïa kane ka jingsbun yn ym klet satia. Khublei, India,” ka la ong shuh shuh.
Kane ka jia hapdeng ka jingjur ka jingkulmar ha West Asia hadien ka jinghiar thma lang jong ki shipai jong ka US bad Israel ha ka 28 tarik u Rymphang ha ki jaka jong ka Iran kaba la wanrah ïa ka jingïap jong u nongïalam ba hakhlieh duh jong ka, u Ayatollah Ali Khamenei bad kiwei kiwei ki riew rangbah, kaba la pynlong ïa ka jingkynthoh kaba jur bha na Tehran.
