Guwahati, Lber:
Ka seng Bharatiya Janata Party (BJP) kaba bat ïa ka jingsynshar ha ka sngi Ba-ar ka la pyllait ïa ki mat treikam jong ka na ka bynta ka elekshon sha ka ïingdorbar thawaiñ ka Assam ka ban long ha une u bnai bad ka la kular ban pyntreikam ïa ka Uniform Civil Code (UCC) ha kine ki lai bnai ban wan lada jied biang ïa ka ha ka bor synshar.
Ka ‘Sankalp Patra’ jong ka BJP, kaba la pyllait paidbah da ka Myntri ka tnat pla tyngka jong ka sorkar pdeng, ka Nirmala Sitharaman ha ka jingïadon lang u Myntri Rangbah ka Assam, u Himanta Biswa Sarma, ka kynthup ïa ki 31 tylli ki jingkular, kynthup ïa ka jingwanrah ïa ka aiñ kaba treikam ban pynkut noh ïa ka ‘Love Jihad’ bad ka ‘Land Jihad’.
Ka seng ka la kular ba kan pynkhlaiñ ïa ki jingïada aiñ ban pynneh pynsah ïa ka riti dustur, ka pateng bad ki hok jong ki paidbah ka Assam da kaba pyntreikam ïa ka UCC, khlem da kynthup ïa ki Sixth Schedule bad ki thaiñ riewlum, ban pynthikna ïa ka hok jong ki jaitbynriew riewlum.
Ka la shim jingkular ruh ban ïada ïa ka khyndew ka shyiap, ki pateng bad ka burom jong ki trai ri trai muluk jong ka Assam da kaba pyntreikam ïa ka Immigrants (Expulsion from Assam) Act, 1950, ban pynkloi ïa ka kam ban lap bad pynkynriah ïa ki poiwir kiba rung be-aiñ.
Ka seng ka la kular ruh ban “pyllait ïa kawei pa kawei ka inshi ka jaka na ka jingshah thombor ha ki briew kiba wan buhai shnong beaiñ bad ban ai ïa ka hok jaka sha baroh ki nongshong shnong ba shisha jong ka Assam” hapoh ka skhim ‘Mission Basundhara’.
Ka la pynthikna ruh ba ka BJP, lada ka wanphai biang ha ka bor synshar ha ka sien kaba lai lynter, kan pyllait noh ïa ki jaka ba la shah ktah kti jong ki Satras, Namghars, Devalayas bad kiwei kiwei ki jaka mane blei.
Ka mat treikam ka la kular ba 5 lak klur tyngka yn bei ban buh ïa ka Assam kum ka khyrdop Eastern Gateway, jong ka India, kaba la kyrshan da ka Asom Gati Shakti Master Plan, ban pynthikna ïa ka jingpyndep ïa ki projek ha ka por kaba biang.
Ka seng ka la kular ruh ban sdang ïa ka ‘Badh Mukt Assam Mission’ da ka jingbei tyngka kaba palat T.18,000 klur ban pynlong ïa ka jylla kaba lait na ka jingshlei um. Ka BJP kan ai ruh ïa 2 lak tylli ki kam sorkar bad kan thaw shuh shuh ïa ki lad seng kam seng jam lyngba ki skhim bapher bapher.
Ka la kular ruh ban “Kawei ka District, kawei ka Medical College, kawei ka University, kawei ka Engineering College”.Ka seng ka la ong ruh ba kan pynkiew ïa ka jingphah pisa kaba beit beit sha ki Bank manla u bnai hapoh ka skhim Orunodoi sha ka 3 hajar tyngka na ka bynta ki kynthei.
Ka la ong ruh ba ka thmu ban ïoh 40 lak tylli ki ‘lakhpati baideo’, ka jingthmu ba kongsan jong ka sorkar Assam kaba thmu ban pynïoh bor ïa ki kynthei ha ka liang ka ïoh ka kot, khamtam kito kiba ïadei bad ki Self-Help Groups (SHGs).
Ka seng ka la ong ba ïa ka jingsiew jong ki nongtrei kper slasha yn pynkiew sha ka 500 shisngi hapoh san snem ban wan. Ki nongtrei kper slasha ruh kin ïoh ïing.
Ka Sitharaman ka la ong ba ïa kane ka mat treikam la pynkhreh halor “ka shisnem jong ka jingkylla jong ka jylla, kaba ka Congress kam shym la lah ban pynurlong ha ki 60 snem”. Ka elekshon sha ki 126 tylli ki assembly konstitwensi ha ka jylla kan long ha ka 9 tarik, Ïaïong, ha kaba ka jingñiew vote kan long ha ka 4 tarik, Jymmang.
