Shillong, Lber 31
Ka India ka la lah ban pynliem ïa ka Hong Kong, China da 2-1 kol ha ka jingïalehkai kaba khatduh jong ka AFC Asian Cup 2027 Qualifier ha ka sngi Ba-ar ha Jawaharlal Nehru Stadium kaba ha Kochi.
Kane ka nam jop ka la wan lyngba u Ryan Williams bad u Akash Mishra na ka bynta ban pynlong ïa kane ka kynhun ïalehkai ka ri ban khur ïa ka jingjop kaba nyngkong ha kane ka lympung.
Kumba ka paw ka India ka la duh rung sha ka Asian Cup, hynrei ka la lah ban pynkut da kaba khur ïa ka jingjop kaba nyngkong na ka bynta ban wan ha ka kyrdan ba khatduh ha ka Group-C. Kane ka kynhun ka la ïaryngkat mar 5 poiñbad ka Bangladesh, kaba la tam lyngba ka jingïapher ha ka jingthep kol bad ban don ha ka kyrdan balai kata hadien ïa ka Singapore (14 poiñ) bad ka Hong Kong China (8 poiñ) kiba la wan ha ka kyrdan ba nyngkong bad ba-ar.
Kumba ka paw ka long ka sien kaba nyngkong eh ïa u Ryan Williams ban ïoh mihkhmat ïa ka India hadien ba u la pynkut noh ïa ka jinglong trai shnong na Australia, ha kaba u la ïoh ban thep ïa ka kol kaba nyngkong eh ha ka minit kaba 4 hadien ka jingïarap pynbuh da u Manvir Singh na ka bynta ban tam shi kol ha ka kylla step.
Hadien katto katne por ka India ka la thep biang sa shi kol ha ka kylla miet lyngba u Akash Mishra hadien ba u Rahul Bheke u la kawang ïa ka bol bad utei u rangïalehkai sha-khmat um shym la pynlehnohei ïa ka kabu ksiar ha ka minit kaba 50.
Hadien 15 minit ka Hong Kong ka la lah ban pynphai kylla shi kol lyngba u Everton Camargo, hynrei ha kaba kut kam shym la lah shuh ban thep bad ka la mad ia ka jingshah rem.
