Nongstoiñ, Lber 31
Ka Mawjai FC ka la jam sha ka final ha ka lympung ïalehkai Open To All Knock -out Football Tourna-ment 2025-26 ba la pynlong da ka New Nongstoiñ Sports Social & Cultural Club (NNSS&CC).
Kane ka jinglah ban pynthikna ka la wan hadien ba ka la ïakhaid mar 3-3 kol bad ka Shilliang Wah Blei ha ka wat kaba ar (2nd Leg) na ka bynta ban tam da 6-3 lyngba ka ‘aggregate’ kaba la long ha ka sngi Ba-ar ha madan New Nongstoiñ. Ïa ka nam Man of the Match la ïoh ban khur da u Wallam Myrthong na ka Shilliang Wahblei.
Na ka liang ka NNSSCC ka la pyntip ba ka jingïalehkai final jong kane ka lympung kan long ha ka 8 tarik u Ïaïong hapdeng ka Evergreen FC na East Khasi Hills pyrshah ïa ka Mawjai FC ha ka por 1 baje mynsngi.
Lah ban kdew hangne ba ka khusnam ha kane ka lympung ka long da ka song pisa ha kaba ka lahduh kan ïoh T. 2 lak tyngka bad kaba wan ba-ar kan ïoh T. 1 lak tyngka.
