Shillong, Lber 31
U khlur ïalehkai Tennis ka ri u Leander Paes, u la pynïasoh ïalade sha ka Bharatiya Janata Party (BJP) hashwa ka ilekshon sha ka Ïingdorbar thawaiñ jong ka West Bengal mynta u snem, kaba long ka jingïoh rung ha ka saiñpyrthei kaba paw hashwa ba kan pynïeng ïa ki kyrtong na ka bynta kane ka ilekshon.
Ha kane ka jingpynrung ïa u la ïadon lang u Myntri ka sorkar pdeng u Kiren Rijiju bad u MP ka BJP u Sukanta Majumdar, kaba pyni ïa ka jingpyrshang jong ka seng ban wanrah ïa ki riew pawkhmat hapoh ka kynhun jong ka.
Haba pdiang sngewbha ïa u Paes, u Rijiju u la pynkynmaw ïa ka jingïalehkai jong u ha ka Barcelona Olympics ha u snem 1996, ha kaba u la ïoh khur ïa ka takma rnong ha ka jingïalehkai para marwei jong ki shynrang, ka khyllipmat kaba u la batai ba ka long kaba kongsan na ka bynta ka jingdon jong ka India ha ka jingïalehkai.
“Ka kyrteng jong ka India ka long kaba kham ñiar ban paw ha ka jingïoh takma. Dei u Leander Paes uba, ha ka sien kaba nyngkong, u la buh ïa ka India ha ka map jong ka Olympic,” la ong u Rijiju. Mynta, un shakri ïa ka ri lyngba ka rynsan jong ka BJP,” u la bynrap.
U Rijiju u la pynpaw ruh shaphang ka jingïalehkai jong u Paes pyrshah ïa u Andre Agassi ha ka Olympic, da kaba ong ba u dap da ka jingsngewsih ban ïohi ba u Paes uba la mynsaw bad pynlong ïa u ba un shah rem, ha kaba u Agassi ha kaba kut u la jam shakhmat ban khur ïa ka takma ksiar.
Ka jingrung jong u Paes sha ka BJP kan long ka jingïarap ban kyntiew shaphrang ïa kane ka seng saiñ pyrthei ha West Bengal namar ba ka khmih lynti ban nangpynïar ïa ka jingdon jong ka ha kane ka jylla hashwa ka ilekshon 2026.
