Shillong, Lber 31
Ka lahduh jong ka aïom ba la lah, ka India ka la khmih lynti ban ïalehkai bha pyrshah ïa ka Bhutan, ha ka semi-final jong ka SAFF U-20 Championship ka ban long ha ka Baang ha National Stadium kaba ha Male, Maldives ha ka por 9 baje mynmiet.
Kawei pat ka jingïakhun semi final kan long hapdeng ka Nepal bad ka Bangladesh ha kaba kan sdang ha ka por 4:15 nohphai sngi.
Kane ka kynhun ïalehkai U-20 ka ri, ka la rung sha ka semi final hadien ba ka la lah ban ïalehkai ha kane ka lympung khamtam eh halor ka jingjop ïa ka Pakistan bad ka Bangladesh.
Ka India ka la lah ban jam sha ka semi final hadien ba ka la ïoh ban bat ïa ka kyrdan ba hakhlieh hadien ba ka la lah ban ïalehkai pyrshah ïa ka Pakistan (3-0 kol) bad ka Bangladesh (1-1 kol) ha ka Group-B.
U coach kane ka kynhun u Mahesh Gawali u la ïaroh ïa ki khynnah ïalehkai jong u halor ka jingtrei shitom bad ka jinglah ban ïalehkai bha. “Ki khynnah ki la ïalehkai bha namar ki lah ban teh lakam bha ïa lade. Ngim shym la ïoh por ban pynkhreh hashwa kane ka lympung, hynrei ki khynnah pyni ïa ka mynsiem ïakhun. Nga sngewkmen shisha bad sngew sarong ïa ka rukom ïalehkai jong ki,” la ong u Gawali.
“Kam long kaba suk. Ngi la pyrshang ban thaw ki lad ban ïoh thep kol, bad ngi donkam ban pynphai. Ngi donkam ruh ban kham pynleit jingmut bha lada ngi kwah ban pynurlong biang ïa ka nam jop,” bynrap biang u Gawali.
Haba phai sha ka Bhutan rung sha ka semi-final hadien ba ka la lah ban ïalehkai bha ha ka Group-A. Ka la sdang da ka jingshah rem ha ka Nepal, hynrei ka la khie im biang da kaba ïakhaid khlem don ba lah ban thep kol pyrshah ïa ka Maldives. Kane ka kynhun ha kaba khatduh ka la lah ban pynliem ïa ka Sri Lanka da 1-0 kol.
Kat kum ka rukom pynïaid jong kane ka lympung, la ong ba lada jia ki kynhun ki kut ha ka jingïakhaid, yn rah beit tie-breaker na ka bynta ban rai ïa ka jingjop.
