Kuwait, Lber:
Ki bor pyniaid ka Kuwait ki iathuh ba kawei ka jhad kit umphniang jong ka Kuwait, ka la shah pynjulor bad shah pynbthei ha ka Iran katba ka dang don ha ka Kad ieng jhad ha Dubai ha ka Sngi Nyngkong.
Ka jinghiar thma kaba paw ha ka jhad kit mar Al Salmi ka dei tang ka jinghiar thma kaba khatduh eh ha ka jinghiar thma ïa ki jhad khaii da ki namding lane ki drone kiba lah ban pynbthei ha ka lyer bad duriaw ha Gulf bad Strait of Hormuz naduh ba ka US bad ka Israel ki la hiar thma ïa ka Iran ha ka 28 tarik u Rymphang.
Ka Kuwait Petroleum Corporation (KPC) ka la iathuh ha ka step jong ka sngi thohdieng, ba ka liengsuin Al Salmi, ka la shah lynshop ha ka jingshah thombor jong ka Iran, ha ka por ba ka dang sahkut ha ka kad lieng jong ka Dubai ha United Arab Emirates, kaba la wanrah ia ka jingjulor jong ka liengsuin bad ka jingpluh ding ha ka liengsuin. Ka la maham ia ka jingtuid umphniang kaba lah ban jia ha ki um ba marjan, la iathuh ka tnad pathai khubor jong ka jylla Kuwaiti, ka KUNA.
Ki bor pyniaid jong ka Dubai ki la iathuh ba ki kynhun pynlip ding ha duriaw ki la lah ban pynlip ia ka ding kaba la mih na ka jingshah thombor jong ki drone bad ki la bteng ban bishar bniah ia ka jinglong jingman, da kaba bynrap ba ym shym la don kano kano ka jingmynsaw bad baroh 24 ngut ki nongtrei ki la shngain.
Ka dor jong ka umphniang Brent, ka la kiew palat 2%, ha ka dor 115.17 shi barel ha ki kynta ba sdang jong ka Asia, hadien ba la mih ka khubor halor ka jingshah thombor jong ka jhad umphniang ha Dubai, hynrei ka la kynran dien khyndiat hadien ba ka Wall Street Journal, ka la thoh ba U President Donald Trump, u kloi ban pynkut noh ïa ka thma, wat lada ka Strait of Hormuz, ka dang khang.
